Теректі ауданының орталығы қазақтың қара домбырасымен шалқыды.
Орталық стадион алаңында өткен «Домбыра – ұлы даланың жаны, рухы, тарихы» шарасы бүтін ауданды ғажайып күйге бөледі. Аудан әкімі Әлия Мұханбетжанова, аудандық мәслихат төрағасы Әлжан Нұрғалиев, аудан әкімінің орынбасары Қалаубек Теміров, «AMANAT» партиясы аудандық филиалының атқарушы хатшысы Мирхат Ибраев пен бірқатар бөлім басшылары теректілік ағайынмен бірген емен-жарқын концерт көрді.
Бұл шараның өзге концерттен ерекшелігі бір мезетте жетпіске жуық теректіліктің домбырада ойнауы болды. Оның ішінде ауданымыздың тәжірибелі күйшілерімен қатар ұлттық өнерге құштар оқушылар бар. Ыстық ықыласқа ие болған олар «Әлқисса» мен «Балбырауын» күйін күмбірлетті.
Кейін аудан басшысы Әлия Биғазықызы құттықтау сөз сөйлеп, ұлттық өнердің дамуына үлес қосып жүрген жандарды марапаттады. Әрмен қарай дәл осындай көңіл-күй дәстүрлі әншілер шеруімен өрнектелді.
Нақтырақ айтсақ, Жеңіс Қайыров, Дәурен Жұмағалиев, Аңсар Сағиев әуелете ән салды. Болашағынан зор үміт күттіретін «Телқоңыр» тобы «Домбыра» деп шырқаса, Оралхан Темірғалиев пен Ерген Мұханбетов күй тартысқа ойысып, сахна төрін нұрландыра түсті.
Кәмшат Қадырғалиева «Домбыра болып сөйледім», халықтық «Шежіре» әжелер ансамблі «Әгугай домбыра», Ислам Мұрат «Домбыра», Айбек Дәулетқалиев «Сәйгүлік», Бақытгүл Қабашева «Домбыра туралы толғау», Сағидолла Ізделеев «Илигай» әнін орындады.
Сондай-ақ Теректі топырағындағы Домбыра күнінде әуесқой домбырашылар өзара бақ сынады. Байқаудың ережесі жарияланғаннан бастап, қатысушылар тіркелген еді. Сегіз қатысушының ішінде бүлдіршіндер, оқушылар және мамандығы әрқилы аға буын болды. Саласы басқа болса да, домбыраға жүрегі елжірейтін оларға кәсіби күйшілер мен дәстүрлі әншілер қазылық жасады.
Сайып келгенде, Федоров жалпы орта білім беретін мектебінің күзетшісі Ерлан Заров бас жүлдені қанжығасына байлап, байқаудың басты жүлдесі үкілі домбыраны жеңіп алды. Осылайша күй мен жыр дәріптелген концертті Елжас Мағзом мен Ислам Мұрат «Қазақстан» әнімен аяқтады.
Ақтілек Әлібекұлы
Теректі ауданы
