Өткен аптаның соңғы күні Теректі ауданында асыл тұқымды мал басы бірден 128 бас сүтті бағыттағы ірі қарамен толықты.
Павлодар облысынан жеткізілген малды Приречный, Богдановка, Долин, Федоров, Ақжайық, Покатиловка және Шаған ауылдық округтері аумағында ұйымдастырылған өндірістік кооперативтер мемлекеттік грант қаражаты есебінен сатып алған.
-Әкелінген мал сүтті, симментал тұқымды қашарлар. Жас жарымдық қашарлардың салмағы 340-330 келі шамасында. Өнім беруге 2-2,5 жаста жарамды болады. Қазақстанның ауа райына бейімделген. Сондықтан бағым-күтімінде қиыншылықтар болмас. Дегенмен жас мал болған соң өсіп, өнім бергенге дейін жақсы күтім, құнарлы азық қажет етеді. Мал алып жатқан теректіліктер осы тұқымның ерекшеліктеріне қанық. Оған қоса, жергілікті мамандар тарапынан ақыл-кеңес беріп, қолдау көрсетуді ұйымдастырамыз. Мал басын асылдандыруға, сөйтіп, сапалы өнім алуды өсіруге біз де мүдделіміз, – дейді осы шаруаның басында жүрген аудан әкімінің орынбасары Ержан Досмақов.
Камелия Қарекесова,
Теректі ауданы
zhaikpress.kz
