Облыс орталығында республикалық “Ұлтын сүйген ұланбыз” шығармашылық байқауы өтті. “Атадан мұра” қоғамдық қоры ұйымдастырған байқауға теректілік өрендер де қатысып, бақтарын сынады.
Нәтиже өте жақсы деуге толық негіз бар. Мысалы, байқаудың 3-5 жас аралығындағы үміткерлер арасында “Вокал” номинациясы бойынша Томирис Ғарифулла бас жүлдені еншілеп, аталмыш байқаудың Алматыда өтетін супер-финалына жолдаманы жеңіп алды.
«Вокал» аталымының 8-10 жас аралығындағы қатысушылары арасында Сұлтан және Бейбарыс Ғарифуллиевтер жүлделі І орынды жеңіп алып, көрермен қошеметіне бөленді.
Жуырда Нұр-Сұлтан қаласында өткен «Бала дауысы» байқауында керемет өнер көрсетіп, «Көрермен көзайымы» атанған Санжар Дәукенов бұл байқауда да өз мықтылығын дәлелдеді. Санжар «Вокал» аталымының 11-13 жас аралығындағы қатысушылары ішінде үздік болып, ару Алматыда өтетін байқаудың супер-финалына баратын болды.
Теректілік өрендерді байқауға дайындаған үлгілі “Өркен” балалар вокалды ансамблі жетекшісі Гүлназ Құсайынова ұйымдастырушылар атынан алғысхатқа ие болды.
Әділет Әлібекұлы,
Теректі ауданы
zhaikpress.kz
