Бүгін "Жайық Пресс" медиахолдингі бас директоры Рауан Сабитов Теректі ауданына арнайы келіп, ұзақ жылдар аудандық газетте редактор болған Нұрзия Сисенбаеваны зейнет демалысына шығарып салды.
Теректі ауданы әкімі Әділ Жоламанов бастаған ауданның атқамінерлері Нұрзия Уалиоллақызын құрметті демалысқа салтанатпен жіберді.
Арнайы келіп, облыс көлемінде алдыңғы лектен көрініп жүрген аудандық басылымның басшысы Нұрзия Уалиоллақызына жылы лебізін білдірген Рауан Сәбитұлы өз қолымен алғысхат, гүл шоғы мен сый-сияпатын табыс етті.
Облыстық "Приуралье" газетінің редакторы Роза Сыиқова өзімен үзеңгілес жүрген әріптесіне тілегін айтып, "демалысқа шықтым деп, тоқтап қалма. Жазарың көп болсын," - деп естелік сыйлығын ұсынды.
Аудан басшысы Әділ Тауфиқұлы теректілік азаматтар атынан Нұрзия Уалиоллақызына құндыз жағалы қырмызы бешпент кигізіп, иығына ақ шәлі жапты.
Аудандық мәслихат хатшысы Әлжан Нұрғалиев бастап, әрі қарай "Әйел.Қоғам"Болашақ" қоғамдық бірлестігі төраймы Гүлмира Төлегенова қостап, Теректінің танылуына, ауданның дамуына өзіндік үлес қосқан Нұрзия Сисенбаеваға ақ тілектер ағылды.
"Тұлпардың орнын тай басар" деген, Нұрзия Уалиоллақызы тәрбиелген журналист, аудандық газеттің жауапты хатшысы Әділет Орынбасаров аудандық "Теректі жаңалығы-Теректинская новь" газетінің директор-редакторы лауазымына тағайындалды.
Камелия Өтеу
Теректі ауданы
zhaikpress.kz
Батыс Қазақстанның маңызды жаңалықтарын біздің Instagr am-дағы парақшамыздан және Telegram арнамыздан алғашқы болып біліңіздер
