Орал қаласында «AINA theatre» ұйымдастыруымен би әлемінің жыл үздігі «West dance» байқауы өтіп, Теректі ауданының үлгілі «Жұлдыз» би ансамблі жеңімпаз атанды.
Ұлтымыздың мәдени өнер саласындағы жетістіктерін насихаттап, оның өркендеуіне ықпал жасау, балалардың бойындағы шығармашылыққа деген талпынысты арттыру, өңіріміздегі «Би өнері» бағытындағы үздіктерді анықтау және шығармашылық ұжымдардың шеберлігін нығайту басты мақсаты болған дода жоғары деңгейде өткен. Оны ансамбльдің жетекшісі Жанар Тайшыбаева жеткізді.
- Біз бұл байқауға екі би апардық. Негізігі ойымыз өте білікті әділқазылар алқасының сынынан өткізу болды. Егер қателіктер болса, алдағы уақытта жұмыстану керегіне мән бердік. «Лови ритм» биін дайындаған өзімнің шәкіртім Камила Тасмұратованың жан-жақтылығы, оқушылардың биді жеткізуіне деген талпынысы көрермендердің ықыласына ие болды,- деді өз сөзінде.
Аталған би мен «Би думан» бас жүлдеге лайық болды.
Ақтілек Әлібекұлы,
Теректі ауданы
