Алғыс айту күніне орай Теректі аудандық мәдениет үйінде этно-мәдени орталықтардың өкілдерімен кездесу өтті. Оған аудан әкімі Тілек Габдушев, мәслихат хатшысы Әлжан Нұрғалиев, ардагерлер кеңесі төрағасы Білікбай Қазиқанов, ауданның құрметті азаматтары және бірқатар бөлім басшылары мен жастары қатысты.
Дөңгелек үстелде өрбіген еркін кездесуде этно-мәдени орталықтардың өкілдері қазақ халқына ыстық лебіздері мен алғыстарын білдірді. Аудандық жастармен жұмыс жөніндегі ресурстық орталық басшысы Нұрсәуле Аткеева да ауданның белсенді жастарына ризашылығын жеткізді.
Сондай-ақ, ауданның құрметті азаматы Сәлім Қоқашев та ел игілігі үшін қызмет етіп жатырған мамандарға алғысын білдірді.
- Ауданымызда түрлі ұлт өкілдері қоныс тепкен. Барлығы татулықта, бірлікте өмір сүріп жатыр. Күні кешегі «Қасіретті қантар » оқиғасында тыныштық үшін күрескен құқық қорғау саласының қызметкерлеріне, ауыл тыныштығын ойлап жүрген полиция өкілдеріне рақмет. Ынтымақта өмір кешіп, әр атқан таңымызға алғыс білдірейік, - деді өз сөзінде.
Шара барысында аудан әкімі Тілек Александрұлы аудандық төтенше жағдайлар бөлімінің №12 ӨСБ бөлімше командирі, азаматтық қорғау старшинасы Н.Абдулов, участкелік инспектор, полиция лейтенанты Н.Мырзағалиев, аудандық қорғаныс істер бөлімінің инспекторы, азаматтық персонал Н.Мағзумов, аудандық орталық ауруханасының медбикесі Д.Дүйсекеева, №2 аурухананың дәрігері Ф.Қазбекова, Теректі колледжінің 3 курс студенті С.Әбішев, «Еднання» украин этно-мәдени орталығының жетекшісі Н.Рунова, «Алтын гюль» татар этно-мәдени орталығының жетекшісі Т. Момотқа алғысхат табыстады.
Дөңгелек үстел одан әрі мәдениет үйі қызметкерлерінің дайындаған «Рақмет, саған, туған ел!» атты мерекелік кешімен жалғасты.
Балнұр Қуанышқызы,
Теректі ауданы
zhaikpress.kz
