Арман қала Астананың туған күнін Теректі жұртшылығы да атап өтті. Аудандық мәдениет үйіне жиналған теректіліктер әсем әннің әуенімен тербеліп, күмбірлеген күйдің ырғағына қошеметті үдетті.
Мәдениет үйіне қадам басқан ағайынды Астана қаласына арналған кітап көрмесі қарсы алды. Қаланың өткені мен бүгіні ұштасқан көрмеден әсер алып, тарихқа қаныққан жұрт әуезді концерттің көрермені болуға асықты. Теректі ауданы әкімінің орынбасары Қалаубек Теміров құттықтау сөз сөйлеп, Елордамыздың әлем сахнасындағы орны туралы атап өтті.
Елжас Мағзом, Ислам Мұрат, Айбек Дәулетқалиев, Кәмшат Қадырғалиев патриоттық әндерден шашу шашса, оларды жас буын өкілдері жалғай кетті.
Жалпы Теректі ауданы таң-тамаша етуден жалыққан емес. Мұның дәлелі басшылық құрамның Елорда күніне үн қосып, сахна төрінен табылуы еді.
Нақтырақ айтсақ, аудандық мәдени-демалыс орталығының директоры Арман Сағидоллин вокалды-инструменталды аспаптар ұжымымен «Ұлыма ақыл» әнін әуелетіп, көрермендердің ыстық ықыласына ие болды. Осылайша Теректі һәм облыс жұлдыздары сахнаға көтеріліп, мерекені мерекеге жалғады.
Әділет Орынбасаров
Теректі ауданы
