Автокөлік иелері үшін көлікті таза ұстау – маңызды қажеттілік. Дегенмен, көлік жууға кеткен есіл уақыт пен қарайған шығынды айтсаңызшы…
Осы мәселені шешудің ең тиімді әрі заманауи жолы – өз-өзіне қызмет көрсететін автокөлік жуатын орталықтар ашу.
Өз-өзіне қызмет көрсету жүйесі – автокөлік иелеріне көлігін өз бетінше жууға мүмкіндік беретін арнайы алаң. Бұл жүйе заманауи технологиялармен жабдықталған, қарапайым және ыңғайлы. Тұтынушы арнайы бекеттерге келіп, қажетті қызмет түрін таңдап, өз көлігін жуу процесін өзі басқара алады.
Теректіліктер, осы тұста аспанға бөркімізді атайық! Өйткені Теректі ауданының орталығында осындай нысан ашылды. Кәсіп иесі Эльдар Зәкіров:
– Бұл орталыққа өзім қаржы құйып, жарты жыл ішінде салдым. Құрал-жабдықтың барлығын Алматыдан әкелдім. Ауданда көлік жуу өте өзекті мәселелердің бірі ғой. Бастаймын деген адамға түрлі кәсіп те бар. Дегенмен ойлана келе, тұрғындардың сұранысына ие көлік жуатын орталық салуға тоқталдым, - дейді.
Эльдар Мадисұлының айтуынша, Теректіде көлік жуу былай тұрсын, айына кемінде екі, үш рет ішуге су таппай, сандаласың. Ол бұл түйткілдің де шешімін тауып, құдық қазған. Қысқасы орталықта су тоқтамайды.
Одан бөлек кәсіп иесі қызмет түрлеріне тоқталды. Алдын ала шаю, көбікпен жуу, жоғары қысымды шаю, балқытылған балауыз жағу һәм құрғату сынды қызметтер бар екен.
Өз-өзіне қызмет көрсететін көлік жуу орталықтары тек тұтынушылар үшін емес, сонымен қатар кәсіпкерлер үшін де үлкен мүмкіндік.
Айта кету керек, орталық аудандық музейдің жанында, яғни Бейбітшілік 175 мекенжайында орналасқан. Таңғы сағат 09.00-ден бастап, түнгі сағат 00.00-ге дейін ашық тұрады.
Ақтілек Әлібекұлы,
Теректі ауданы
