Бүгін су тасқынының алдын алу мақсатында Жаңақала ауданының әкімі Алпамыс Жаңабайұлы барлық мекеме басшысын, техникаларды жинап, кез келген жағдайға дайын болуы керек екендігі жөнінде түсіндірме жұмысын жалғастырды.
- Біздің мақсатымыз алапат су екпіні алған жағдайда елді мекеннің барлығын аман алып қалу. Алдын ала Қамыс-Самар жайылмаларына, Қашқаркөл сияқты кеуіп қалған көлдерді, бөгеттерді босатып, толассыз суды сол бағыттарға шығаруға әрекеттенудеміз. Бұл шаралар тоқтамауы қажет. Қазіргі уақытта Қызылжар, Қосжыра және Сарыкөлдің тұсындағы арна, Жаңажол ауылындағы төрт қақпа толығымен және Саршығанақ өзеніндегі су қоймасының 6 қақпасы да ашылып жатыр. Бірақ су тасқыны бірыңайланған кезде қажетті деңгейде су қоймасына су ұстаймыз. Қазіргі сәттегі міндетіміз келген суды қабылдап алу және күшімізді бір адамдай жұмылдыру. Осыған орай аудан мекемелерінің қолда бар техникаларын, соның ішінде Жаңақала желілік-өндірістік басқармасымен де келісілді. Сарыөзен бойынша секундына 100 текше су ашылды деген ақпараттар легі келіп жатыр. Осы жағдайда басқа аудандардағыдай коммуникация мәселесіне аса назар аударып, электр жарығы мен газ тұрбаларына өте мұқият болу талап етіледі. Жол қатынысының қолайсыздығына байланысты барған көліктен елді-мекен тұрғындарына дәрі-дәрмек қорын қатыстыру керек екенін ескертемін. Мекемелерден бөлінген автокөліктерден бөлек жеке кәсіпкерлерге де хабар жеткізілді. Шаруа қожалық басшыларына да малдарды су беткейлерінен алшақ ұстау туралы ескертпелер айтылды, - деді аудан басшысы.
Әрі қарай Алпамыс Жаңабайұлы мен төтенше жағдайлар бөлімінің басшысы Тұрарбек Апақаев мекемелерден жиналған барлық техникаға жеке тоқталып, бөлім басшыларымен байланысқа шықты. Содан соң тағы да тиісінше тапсырмалар беріліп, белсенді түрде бірге жұмыс бірге жұмыстануға шақырды.
Ақерке Ғилымхан,
Жаңақала ауданы
zhaikpress.kz
