Бүгін Қаратөбе аудандық мәдениет үйінде ұлттық мейрам Республика күніне арналған салтанатты шара өтті.
Салтанатты жиында сөз алған аудан әкімі Қадыржан Сүйеуғалиев қаратөбеліктерді Республика күнімен құттықтап, елеулі еңбектерімен көрінген бір топ сала қызметкерлерін марапаттады.
– Биыл Республика күні қайтадан ұлттық мереке ретінде аталып өтілмек. Мемлекеттің егемендік туралы Декларациясы 1990 жылы 25 қазанда Жоғарғы Кеңестің қаулысымен қабылданды. Бұл құжат ел тәуелсіздігіне жасалған алғашқы қадам болды. Егемендігімізді алғаннан бері рухы асқақ қазақ елі, ынтымағы мен бірлігі жарасып болашаққа нық қадам басты. Тәуелсіздік жылдары Қаратөбе ауданында да толымды жұмыстар жасалып, көптеген мәселелер шешімін табуда. Білім беру, мәдениет, спорт, денсаулық, құрылыс және ауыл шаруашылығы салалары бойынша айтарлықтай жетістіктерге қол жеткіздік, - деді аудан әкімі Қадыржан Орынбасарұлы.
Мерекеге орай Сәуле медициналық пунктінің фельдшері Ұлдай Нұрмышева, аудандық білім беру бөлімінің бас маманы Есенгүл Рабаева, аудандық коммуналдық кәсіпорны Қаратөбе-Үшана су желісінің операторы Ғалым Қазмағанбетов Батыс Қазақстан облысының әкімі Ғали Есқалиевтің алғысхатына ие болды. Қазақстан Республикасы Мемлекеттік қызмет істері агентігінің Батыс Қазақстан облысы бойынша департаментінің алғысхатымен Қоскөл ауылдық округі әкімі аппаратының жетекші маманы Нұржауған Дүйсенғалиева, Қазақстан Республикасының «Атамекен» Ұлттық кәсіпкерлік палатасының экономика және жеке кәсіпкерлікті дамытуға қосқан елеулі еңбегіне сай «Адал еңбегі үшін» ІІІ дәрежелі медалімен жеке кәсіпкер Тоқтар Омаров марапатталды. Сонымен қатар ауданның түрлі саласында қажырлы еңбек етіп жүрген бірқатар қызметкерлерге аудан әкімінің алғысхаты берілді.
Салтанатты жиын аудан көркемөнерпаздарының «Қыран елім - Қазақстаным» атты мерекелік концертіне ұласты. Концерттік бағдарламада әсем ән шырқалып, өнерпаздар көрермендерге керемет көңіл күй сыйлады.
Айтулы мерекеге орай аудан орталығындағы алаңда Егіндікөл, Жусандыой, Аққозы, Қаратөбе ауылдарынан келген ауыл шаруашылығы өнімдерін өндірушілердің жәрмеңкесі өтті. Онда ет, сүт өнімдері, тары-талқан сонымен қатар картоп пияз, сәбіз сынды бақша дақылдары да сатылды.
Ерболат Райсов,
Қаратөбе ауданы
zhaikpress.kz
