Бүгін Жаңақала ауданы орталығындағы «Асылым» мейрамханасында жастармен жұмыс жөніндегі ресурстық орталықтың ұйымдастыруымен «Жомарт жүрек–2022» және «Жыл үздігі–2022» жеңімпаздарын марапаттау рәсімі өтті.
Салтанатты жиынға аз қамтылған көпбалалы отбасыларға, ата-анасының қарауынсыз қалған жетім балаларға, мүгедектерге, Ұлы Отан соғысының ардагерлеріне, зейнеткерлерге қайтарымсыз көмек көрсеткен «Жомарт жүрек» иелері, сондай-ақ биылғы жылы қоғамның дамуына үздіксіз үлес қосып, аудан көлемінде жоғары жетістіктерге жетіп жүрген түрлі сала мамандарынан жыл үздіктері қатысты. Жиналған қонақтарды маңызды да ерекше күнмен аудан әкімі Дархан Закарин құттықтап, осындай игі бастама келер жылы да жалғасын табатынын айта өтті.
Одан соң кеңпейілділікпен, адалдықты, адамгершілікті ту еткен дархан жүректі, игі істердің бастамасы болып жүрген 10 жомарт жанға және қызметтерін бар ықыласымен, асқан сүйіспеншілікпен атқарып жүрген үздік сала мамандарына грамоталар мен сыйлықтарын табыс етті. Шара барысында жеке кәсіпкер Талғат Байкенов, мәслихат хатшысы Серік Жәрдемалиев, Жаңақала ауылдық округі әкімі аппаратының жетекші маманы Сейілхан Жұмасалихов және жас ұстаз Ақеділ Ғұбашев марапат иелеріне жылы лебіздерін білдіріп, құттықтау сөзін арнады.
Көңілді кешті мәдени-демалыс орталығының өнерпаздары әсем әнмен әрледі.
Нұргүл Елтайқызы,
Жаңақала ауданы
zhaikpress.kz
