Қазақстан халқы Ассамблеясының 25 жылдығына орай ұйымдастырылған «Тұңғыш Президент жолымен» атты халық экспедициясының эстафетасын табыстау үшін Қазталов ауданы әкімінің орынбасары Рүстем Зұлқашев бастаған делегация бүгін Тасқала ауданына келді.
Аталмыш шараға Батыс Қазақстан облысы Қазақстан халқы Ассамблеясы төрағасының орынбасары Қапақов Ғайса Хамидоллаұлы арнайы қатысты. Алдымен қонақтарға қош келдіңіз айтқан аудан әкімі Алдияр Халелов өз сөзінде елімізді мекен еткен жүзден аса ұлт пен ұлыстардың бірлігі мен татулығын, қала берді достығын тілге тиек етті. Одан әрі қонақтар Абай ескерткішіне гүл шоқтарын қойып, бес бағыт бойынша ұйымдастырылған диалогтық алаңға қатысып, өз ойларын ортаға салды.
Жиын барысында сөз алған БҚО әкімі аппаратының бас инспекторы Ж.Жұмағазива әйелдер кеңесінің міндеттері мен маңызына тоқтала келіп, бүгінгі ұрпақ тәрбиесіне қатысты тағлымды әңгіме өрбітті.
-Бүгінде әйелдер кеңесі әр ауданда жұмыс атқаруда. Олардың өз жоспарлары мен іс-шараларынан бөлек, мойындарына алған жүктері ауыр. Әйел – күллі қоғамның негізін қалаушы. Халқымыз «әйел бір қолымен – әлемді тербетсе, бір қолымен – бесік тербетеді» дейді. Бала тәрбиесіне ғана араласып қоймай, қоғамның алға басуына да өзіндік үлесін қосып келе жатқан әйелдер. Сондықтан елге үлгі боларлықтай келіндерімізді қолдап-қорғап, аналарымыз бен әжелерімізді ардақтай білген абзал,- деді ол өз сөзінде. Жиында Казталов аудандық аналар кеңесінің атқарған жұмыстары да баян етілді. Әрі ұлттық дәстүр мен ырым-тиымдарды насихаттау барысында өткізілген шаралар талқыланып, біраз ұсыныс-пікірлер ортаға салынды.
Шара аудандық мәдени демалыс орталығының фойесінде ұйымдастырылған Қазталов ауданының көрмесін тамашалаумен жалғасты. Көрші аудан көркемөнерпаздары тасқалалықтарға тартымды концерттік бағдарлама да ұсынды. Мұнда, әсіресе, Баян Құбайқызы жетекшілік жасайтын «Қыз Жібек» термешілер ансамблінің әуелете салған термелері көпшілік көңілінен шықты. Концерт соңында Қазталов ауданы әкімінің орынбасары РүстемЗұлқашев Тасқала ауданының әкімі Алдияр Халеловке «Тұңғыш Президент жолымен» халық экспедициясы эстафетасының кітабын салтанатты түрде табыстады.
Назгүл Жәрдемова
cуретке түсірген Шынтемір Қадыров
Тасқала ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
