Жәнібек спорт клубында аудандық мәдениет, тілдерді дамыту, дене шынықтыру және спорт бөлімінің, Жәнібек спорт клубының ұйымдастыруымен аудан әкімінің кубогіне арналған футзалдан ерлер арасында екі күнге созылған халықаралық турнир өз мәресіне жетті.
Аталмыш турнирге Ресей еліне қарасты Волгоград қаласынан «Қайрат», Қалмақ Республикасынан «Волга», Саратов облысынан «Достар», Бөкей ордасы ауданынан «Сайхын», Жәнібек-1, Жәнібек-2 және Ақоба, Күйгенкөл ауылдық округтерінің командалары қатысып, бақ сынасты.
Ашылу салтанатында сөз алған аудан әкімінің орынбасары Жақсылық Абдолов және Ресей Федерациясы Дума депутатының көмекшісі, «Церен» қоғамдық бірлестігінің төрағасы, дәрігерлер арасындағы футболдан әлем чемпионы Евгений Хечиев барша қатысушы спортшыларға жылы лебіздерін білдіріп, жеңіс тұғырынан көрінулеріне тілектестігін білдірді.
Турнир қатысушылары айтқандай, жарыстың басты мақсаты – жеңімпазды анықтау ғана емес, көршілес елдің спортшыларымен достық байланысты нығайту. Тұтастай алғанда, барлық командалар әдемі ойын көрсетіп, жоғары спорттық дайындықтарын аңғартты.
Бүгін ойынның ақтық кезеңі ұйымдастырылып, үздіктер анықталды.
Жарыстың нәтижесінде аудан намысын қорғаған Жәнібек құрама командасы жүлделі 1-орыннан көрінді. Сонымен қатар Ақоба ауылдық округінің командасы 2-орын, Ресей елінің Волгоград қаласынан келген «Қайрат» командасы 3-орынды місе тұтты. Сондай-ақ «Үздік ойыншы», «Үздік қақпашы», «Үздік қорғаушы» аталымдарымен тиісінше Дамир Қиясев, Данияр Зубаиров және Асхат Құрманғалиев марапатталды. Барлық жеңімпаз командаларға диплом, кубок және ақшалай сыйлықтар табыс етілді.
Лаура Халина,
Жәнібек ауданы
zhaikpress.kz
