Казталов ауданы БҚО бойынша Жастармен жұмыс жөніндегі ресурстық орталық басшылары ауданымызға жұмыс сапарымен келді.
Ауданымызға ат басын тіреген жастар аудандық музейдің жұмысымен танысты. Аудандық кітапханада Казталов ауданының әкімі Асланбек Сарқұлов БҚО Жастармен жұмыс жөніндегі ресурстық орталығының белсенді жастарын қабылдап, еркін форматта кездесу өткізді. Кездесуге БҚО Өңірлік коммуникация басшысы орынбасары Белен Ашимов, БҚО жастармен жұмыс жөніндегі ресурстық орталығының директоры Аңсар Ибраев, БҚО жастармен жұмыс жөніндіге ресурстық орталығы басшы орынбасары Нұрсұлтан Сәрсенбаев, Жастар бастамаларын қолдау бөлімінің басшысы Бибі Уали, Ақпараттық талдау бөлімінің басшысы Диляра Тілек және басқа аудандардан келген жастар қатысты.
- Жастар елдің болашағы мен ертеңі. Олар өздерінің біліктілігі мен білімдігінің арқасында жақсы нәтижелерге қол жеткізіп келеді. Күнделікті тұрмыс-тіршілікте болып жатқан оқиғаларға бейқам қарамайтын, әрқашан көмекке мұқтаж жандарға қол ұштарын созып жүрген жастарымыздың өнегелі істерін айтып өтпеуге болмайды. Атап кететін болсам, су тасқыны кезіндегі жастарымыздың қолдауы, көмегі ерекше болды. Өздеріңізбен пікір алмасу арқылы ұсыныс-пікірлеріңізді тыңдап, бірлесіп жұмыс істеу маңызды. Мен әрқашан жастарымызды қолдаймын. Сіздерден «Мен оқыған 30 кітап» жобасын облыстық деңгейге көтеру жұмыстарына қолдау білдірулеріңізді сұраймын, - деді аудан әкімі Асланбек Ахметоллаұлы.
Кездесу барысында аудан басшысы жастарға ауданда атқарылып жатырған жұмыстарды баяндаса, жастардың «Жұмысшы мамандықтар жылына» байланысты мал шаруашылығының мамандарының қоғамдағы рөлін көтеру мақсатында облыс көлемінде өтетін шараға қолдау білдіруге және де басқа да ұсыныс-пікірлерін айтты.
Гүлнұр Бөлешова,
Казталов ауданы
