Жаңақалада еңбек ардагері, ауызы дуалы, сөзі уәлі, ел ағасы Нәсіпқали Мақанұлын білмейтіндер кемде кем. Ол талай жылдар қоғамға қалтқысыз қызмет етіп, елдің мұңы мен жоғын жоқтап, жарғақ құлағы жастыққа тимей еңбек еткен ардақты азамат. Кейінгі өскелең ұрпаққа, яғни біздерге берер өнегесі мен тәлім-тәрбиесі мол жан. Нәсіпқали атаның тарихи-танымдық мақалалары мен ізденістері, жыр-толғаулары аудан тарихы мен мәдениетіне қосқан зор үлесін - туған жерге деген адал перзенттік махаббаты деп білеміз.
80 жыл ғұмырында талай-талай ізгі бастамалардың басы қасында болып, ауданымыздың мәдениеті мен әдебиетіне тіпті экономикасының дамуына сіңірген еңбегі атан түйеге жүк болардай. Атаның еңбектері тек аудан ғана емес облыс, республика көлемінде насихатталып, өз бағасын да алып жүр. Қоғам, мәдениет қайраткері, «Жаңақала ауданының құрметті азаматы», түрлі орден, медальдардың иегері Нәсіпқали Махановтың өмір жолы талай ұрпаққа үлгі-өнеге. Туған жерден табан аудармай еңбек етіп, түрлі жоғарғы қызметтерге шақырылса да, ерік-жігерін туған еліне арнап, атақ, марапат пен мансапқа қызықпаған тұлғаның өмірі кім-кімді де қызықтырмай қоймасы анық. Бар саналы ғұмырын ауданның қарыштап дамуына арнаған атамыз түрлі қызметтер атқарған. Басшылық қызметте жүрсе де, қарапайым қалпынан танбай қалтқысыз қызмет еткенін ел аузынан естіп, біліп жүрміз. Сексеннің сеңгіріне келсе де, әлі күнге дейін қолынан қаламы түскен жоқ. Атаның қаламынан туған өлең жинақтары да оқырман жүрегіне жол тауып, жата-жастана оқитын кітаптарына айналды. Сол оқырмандардың бірі – менмін. Бүгінде 80 жасқа толып отырған Нәсіпқали Мақанұлына ұзақ ғұмыр, шалқар шабыт тілейміз. Атаның өскелең ұрпаққа берері көп. 90 жылдық тарихы бар ауданымыздың тарихы мен қоса сонау шежірелер мен ата-бабаларымыздан ауыздан-ауызға тарап жеткен сөздер мен есті әңгімелері атаның көкейінде әлі күнге сайрап тұр. Осындай асыл аталарымыздың бірі де бірегейі Нәсіпқали атаға амандық тілеймін. Өткен мен бүгінді жалғап тұрған қаламыңыздан қасиет арылмай, тарихтың тағылымды шежірелерін шерте жүріп, өлеңдеріңізбен өскелең ұрпақты тәнті етіп, қасқайған қалпыңызбен ұзақ жасаңыз. Сіздің өнегелі өміріңіз өскелең ұрпаққа әрқашан да үлгі. Жаңақаланың нардай Нәсіпқалиы болып, асулардан аса беріңіз!
Жанна Тұрсынғалиева,
Жаңақала аудандық тарихи-өлкетану музейінің экскурсоводы
