Шымкент қаласында 2010-2011 жылдары туған жасөспірімдер арасында волейболдан Қазақстан Республикасының біріншілігі өткен болатын.
Сол жарыста Жалпақтал ауылындағы Ғинаят Молдашев атындағы жалпы орта білім беретін мектебінің командасы II орынды жеңіп алып, жүлдегерлер қатарынан табылды. Жарыстың «Үздік ойыншылар» аталымына Ұлан Бақман, Мержан Берікұлы ие болып, командаластарын қуантты.
-Бұл біріншілікке қатысып, жүлде алу біз үшін үлкен жетістік. Айтулы жарыста дағдарысқа бой бермей, жақсы ойын көрсеткен команданың ұйымшылдығы мен шеберлігінің жарқын нәтижесіне ризамын. Осы додан кейін біздің команда алда өтетін Республика чемпионатына жолдамаға ие болды. Сол чемпионатқа қатысуға жергілікті әкімдік жол ашып, спортшыларға жол қаражатынан көмек көрсетсе, нұр үстіне нұр болар еді. Сондықтан жасөспірім спортшылардың атынан қажет кезде құрмет көрсетіп, қолдай білген ата-аналарға алғыс айтып, шәкірттеріме алдағы жарыстарда толайым табыстар тілеймін, - дейді команда жетекшісі Тимур Бақтығалиұлы.
Жасөспірімдер жеңісі құтты болсын, жерлестер!
Қыдыр Харесұлы,
Казталов ауданы
