Теректі аудандық жастармен жұмыс жөніндегі ресурстық орталығының ұйымдастыруымен «Жыл үздігі—2022» дәстүрлі марапаттау кеші өтті.
Айта кетейік, сан алуан кәсіп иелерінің арасынан ең үздіктерін анықтаған жастар сыйлығы сегіз номинацияға бөлінді.
«Жыл үздігі—2022» жастар сыйлығын табыстау үшін аудан әкімі Тілек Габдушев сахна төріне көтеріліп, жастарға жылы лебізін жолдады.
Жыл қорытындысы бойынша «Үздік полиция қызметкері» — Теректі аудандық полиция бөлімінің аға лейтенанты Дулат Аққайдаров, «Үздік құтқару жасағы қызметкері» — Жастілек Дулатов, «Үздік жас дәрігер» — Теректі аудандық №1 орталықтандырылған ауруханасының жалпы тәжірибелі дәрігері Мөлдір Таменова, «Үздік жас ұстаз» — Аңқаты жалпы орта білім беретін мектебінің химия пәні мұғалімі Азамат Мерзуандарға берілді. Аудандық мәслихат хатшысы Әлжан Нұрғалиевтің қолынан «Үздік спорт жаттықтырушысы» аталымын подстепныйлық Ерлан Сағыналин, «Үздік жас дарын» номинациясын Ақжайық ауылдық мәдениет үйінің әдіскері Нағима Мұрадымова, «Үздік кітапханашы» аталымын аудандық балалар кітапханасының меңгерушісі Айнагүл Турекешова алды. «AMANAT» партиясы аудандық филиалы төрағасының атқарушы хатшысы Мирхат Ибраев «Үздік волонтер» аталымын приречныйлық Бибінұр Бакисоваға табыс етті.
Аудандық жастармен жұмыс жөніндегі ресурстық орталығының басшысы Нұрсұлтан Кәдірғалиев жыл бойы атқарылған істер жайында баяндама жасады.
— Округтердегі жастар жетекшілері еріктілермен бірге қариялардың үйін, ауласын жинап көмек көрсетіп жүр. Бұл шара екі жұмада ұйымдастырылады. Қарттар күніне орай Ақжайық ауылдық округіндегі қос қарияға отынмен көмек көрсетілді. Аңқаты, Шағатай секілді ауылдарда да көмек жұмыстары болды.
«Теректі тур» деген атаумен әр округтегі жастар жетекшілерін ауданымыздың көрікті жерлері «Тақсай ханшайымы», «Сәуір жары», «Полусов жары» секілді жерлерге экскурсия ұйымдастырдық,—деді өз сөзінде.
Одан әрі жыл бойы белсенділік танытып, әр округте жұмыстар атқарған жастар жетекшілеріне өз атынан алғыс хат табыстады. Сондай-ақ, облыстық жастармен жұмыс жөніндегі ресурстық орталығының басшысы Аслан Тапишевтің атынан Ұзынкөл ауылдық округінің жастар жетекшісі Макка Мухсинова, шағандық Равиль Мұхамбетқалиев алғысхатпен марапатталды.
Балнұр Қанаева,
Теректі ауданы,
zhaikpress.kz
