Жуырда Тасқала аудандық мұсылмандар мешітінде Орал қалалық «Тәжиден Батырұлы» мешітінің найб имамы Әсет Раманқұловпен кездесу өтті.
Аталған кездесуге аудан жамағаты қатысып, көкейдегі сұрақтары мен толғандырған мәселелеріне жауап алды. Белгілі ұстаз кездесуде мұсылман бейнесі, діни сауаттылық, қасиетті Мәуліт айының қадір-қасиеті, ардақты пайғамбарымызға деген махаббат, мешітке деген жанашырлық, мұсылман әдебі тақырыптарында сөз қозғады.
- Мұсылман баласының діни сауаттылығы – оның бағыт-бағдарының айғағы. Дана қазақтың «Мұсылман – мұсылманның айнасы» деген даналық сөзі бекерге айтылмаған. Бүгінгі қоғамда үлкен талқыға түскен діни мәселеге осы сауатсыздық кінәлі. Бүгін жас, аға буын әр ісін саралап, ардақты пайғамбардың амалындай жасауға тырысса, оның әр сүннетін жаңартып жүрсе, үлкенге өнеге, кішіге ізет етсе жақсы болар еді. Өйткені, асыл дініміз бізді жақсылыққа, өнегеге, сыйластыққа шақырады, - деді ұстаз Әсет Исламбекұлы.
Сонымен қатар кездесуден кейін жамағат арасында пайғамбарымыздың өмірбаянына қатысты тест тапсырмалары беріліп, жеңімпаздар анықталды. Нәтижесінде І орынға Қайырбек Ғаббасов, ІІ орынға Диас Шурин, ІІІ орынға Тыныштық Ажғалиев ие болып, естелік сыйлықтар табыс етілді.
Шара соңында жамағатқа арналған дастархан жайылып, ауданымыздың бірлігі, мешітіміздің құрылысына дұға жасалды.
Меңдібек Нұрболатұлы,
Тасқала ауданы
