Бүгін Жаңақала ауданы әкімінің қолдауымен, Жаңақала аудандық мәдениет, тілдерді дамыту, дене шынықтыру және спорт бөлімінің, аудандық «Jastar» спорт клубының және «Темір Бүркіт» қоғамдық бірлестігінің ұйымдастыруымен 16 желтоқстан – Қазақстан Республикасының Тәуелсіздік күніне арналған ерлер командалары арасында Жаңақала футзал және волейбол лигасының ашылу салтанаты өтті.
Футзалдан жоғары лигаға және қызмет лигасына, сонымен қатар, волейбол лигасына қатысатын командалар сапқа тұрғызылып, мемлекеттік Гимн орындалды. Ашылу салтанатында аудан әкімі Алпамыс Жаңабайұлы, аудан әкімінің орынбасары Руслан Қонысбайұлы, Жаңақала ауылдық округі әкімі Ақан Болатұлы, ішкі саясат бөлімінің басшысы Азат Ранилұлы, аудандық мәдениет, тілдерді дамыту, дене шынықтыру және спорт бөлімі басшысы Ақнұрлы Нұрғалиқызы және «Jastar» спорт клубының директоры Жанболат Жасқайратұлы бой көрсетті. Шарада сөз алған Алпамыс Көшкінбаев барша қатысушы командаларға сәттілік тіледі. Үлгілі «Гүлдәурен» би ансамблінің «Жастар биі» (жетекшісі Э.Валиева) мен Жанболат Мұсағалиевтің орындауындағы «Қазақ спорты» әні қатысушыларға ерекше леп беріп, көрермен көңілінен шықты.
Жаңақала футзал лигасы аптаның сейсенбі және бейсенбі күндері сағат 20:00 – 22:30 аралығында, волейбол лигасы дүйсенбі және сәрсенбі күндері сағат 20:00 – 22:30 аралығында Жаңақала мектеп гимназиясында өтетін болады .
Ақерке Мәлікқызы,
Жаңақала ауданы
zhaikpress.kz
