Жаңақала ауданында республикалық ақпараттық түсіндіру тобының мүшесі, Орал қаласындағы Дін мәселелерін зерттеу орталығының бөлім басшысы, исламтанушы Абдувахит Бабаханов іс сапармен келіп, аудан тұрғындарына түсіндірме жұмыстарын жүргізді.
Аудандық ішкі саясат бөлімінің бас маманы Нұрғали Ғаббасов жиынды ашып, Абдувахит Абытханұлын таныстырған соң Жаңақала колледжі студенттерімен «Жастар арасындағы медиа сауаттылықты арттыру» тақырыбында мемлекет пен діннің қарым-қатынасы, дін туралы ақпаратты қайдан алу керегі жөнінде колледж студенттеріне баяндама жасады. Кейін аудандық білім беру бөлімінің әдіскері Жадыра Төлеуғалиева және ауданның барлық мектептері директорының тәрбие ісі жөніндегі орынбасарлары, психологтары, әлеуметтік педагогтары қатысқан жиында «Деструктивтік діни ағымдардың таралуын алдын алу» туралы семинар өткізді. Мектеп мұғалімдері қазіргі кездегі мектеп формасы мәселесі жөнінде сұрақтарын қойып, еркін сұрақ-жауап форматында әңгіме өрбітті. Үшінші жиын Жаңақала мектеп-гимназиясы мәжіліс залында өтіп, «Теріс идеологияға қарсы сыни – ойлау дағдыларын қалыптастыру» тақырыбында 8-11-сынып аралығындағы мектеп оқушыларымен кездесу ұйымдастырылды.
Оқушылар тоқсандық демалыс болса да белсене қатысып, өздеріне керекті ақпараттарын алды. Содан соң Рухани орталық ғимаратының мәжіліс залында еңбек ұжымдарымен кездесті. Кездесуде қоғамда дінтанулық сауаттылықтың маңыздылығы жөнінде сөз болып, жиынға қатысушылар өздерінің көкейіндегі сұрақтарын қойып, жауабын алды.
Сыйлыхан Жұмасалық,
Жаңақала ауданы
