Бүгін Жаңақала ауданы әкімдігінің үлкен мәжіліс залында өткен сессия жұмысына аудан әкімі Алпамыс Көшкінбаев, орынбасарлары, аудандық мәслихат депутаттары, мекеме басшылары мен ауылдық округ әкімі аппаратының мамандары қатысты. Сессия отырысын аудандық мәслихат төрағасы Қамбар Қаменов жүргізді.
Күн тәртібіндегі алғашқы мәселе бойынша аудандық жұмыспен қамту және әлеуметтік бағдарламалар бөлімінің басшысы Дәурен Жарасов аудандық мәслихаттың «Жаңақала ауданының әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы» 2023 жылғы 5 қазандағы №10-5 шешіміне өзгеріс енгізу туралы хабарлады.
Аудандық экономика және қаржы бөлімінің басшысы Ақылбек Семенов Жаңақала ауданының 2025 жылға бюджеттік кредит беру, бір жолғы көтерме жәрдемақы беру туралы және Жаңақала аудандық мәслихатының 2024 жылғы 24 желтоқсандағы № 24-1 «2025-2027 жылдарға арналған аудандық бюджет туралы» шешіміне өзгерістер енгізу туралы шешім жобаларын баян етті. Атап айтқанда, аудандық мәслихат депутаттарының қолдауымен аудандық "Jastar" спорт клубына микроавтобус сатып алуға 18,9 млн теңге, «Жасыл ел» бағдарламасы бойынша әр ауылға 100 сарбазға 9,6 млн теңге, Мәстексай ауылындағы шағын футбол алаңын жаңартуға 5,0 млн теңге, Жаңажол ауылына техникалық су тартуға 4 млн теңге, Мәстексай ауылына 3,3 млн теңге, Жаңақазан ауылына 5,8 млн, Ақбалшық елді мекеніне 4,2 млн теңге, Салтанат, Саралжын елді мекендеріне электр желісін жөндеуге 5,0 млн теңге, жаяу жүргіншілер жолын салуға Қызылоба ауылына 7,0 млн теңге, Пятимар ауылына 4,4 млн теңге, Жаңақала ауылының газ құбырлары мен олардағы құрылыстарға техникалық қызмет көрсету бойынша 5,0 млн теңге және ағымдағы жылы мәдени-демалыс орталығының «Мәңгілік алау» аллеясын жөндеуге 6,5 млн теңге қаржы бөлінді.
Аталған мәселелер бойынша шешім қабылданып, аудандық мәслихаттың кезектен тыс 26-сессиясы өз жұмысын аяқтады.
Айзада Ақбасова
Жаңақала ауданы
