Жаңақалада «Ағайын» дәмханасы және радио такси қызмет көрсету орталығы ашылды.
Орталықтың ашылуында алғашқы болып сөз алған аудан әкімі кәсіпкерлік нысанды ашып отырған Сапаровтар әулетін құттықтап, бастап жатырған істеріне сәттілік тілесе, Сапаровтар әулетінің үлкені, еңбек ардагері Ф.Сапаров інілерінің бірлігіне алғысын айтып, жүрекжарды тілегін жеткізді.
Сапаров Серікқали Әбілғазыұлы 2014 жылы өзінің аға-інілерімен бірлесе отырып «Серік» ЖК ашқан. Сол жылдардан бастап бүгінгі күнге дейін жалға алған ғимаратта қоғамдық тамақтандыру және жолаушылар тасымалы бағытында халыққа сапалы қызмет көрсетіп келді. Ағайынды Сапаровтар өз кәсіптерін кеңейту мақсатында 2017 жылы «Нәтижелі жұмыспен қамту және жаппай кәсіпкерлікті дамытудың 2017-2021» бағдарламасымен «Ауыл шаруашылығын қаржылай қолдау қоры» АҚ арқылы 9,0 млн. теңге несие рәсімдеген. Осы қаржыны мақсатты жұмсай отырып, дәмхана ғимаратының құрылыс жұмысын жүргізіп, ішін қажетті құрал-жабдықтармен жабдықтаған. Қазіргі таңда «Ағайын» дәмханасы қоғамдық тамақтандырумен қатар, радио такси қызметін көрсететін орталық болып ашылып, ауданымыздың халыққа қызмет көрсету саласын дамытуға атсалыспақ.
- Біз осымен тоқтап қалмай, заман ағымына ілесе отырып, өз кәсібімізді дамытып, одан әрі кеңейтуді жоспарлап отырмыз. Алла сәтін салса, болашақта дәмхана жанындағы бос орыннан автокөлік жуу, техникалық көлік жөндеу орталығын ашуды жоспарлап отырмыз,- дейді дәмхана қожайыны С.Сапаров.
Н.ҒАББАС
Жаңақала ауданы
