Жаңақала ауданы орталығында Құрбан айт мерекесіне жиналған жамағаттың қарасы көп болды.
Аудандық мешіттің бас имамы Ерік Сұлтанов дін құндылықтарынан насихат-уағыз айтып, барша жұртты мейраммен құттықтады. Мерекенің мән-маңызын ұғындырып, жамағатпен айт намызын оқыды. Бұдан кейін жаңақалалықтар аудандық стадионға барып, арнайы бөлінген жерде құрбан шалды.
Жаңақала ауылдық округ әкімдігінің мәліметі бойынша, осы күні 1 сиыр, 21 қой сойылыпты. Құрбан еттері мұқтаж жандарға, жетім-жесірлерге таратылып, 100-ге жуық отбасыға көмек көрсетілді.
Құрбан айт мерекесі құрметіне тұрғындар арасында қол күресі, кір тасын көтеру, қазақша күрес, арқан тартыс, асық ату ойындары ұйымдастырылып, сайыстың жеңімпаздарына дипломдар мен ақшалай сый-сияпаттар табыс етілді. Сондай-ақ, балаларға діни бағыттағы сұрақтар қойылып, сыйлықтар мен тәттілер берілді.
Алтынбек ЕРМЕКҚАЛИЕВ,
Жаңақала ауданы
