Бүгін Жаңақала аудандық балалар және жасөспірімдер спорт мектебінде аудандық жастармен жұмыс жөніндегі ресурстық орталығының ұйымдастыруымен 16-35 жас аралығындағы жастар арасында шахмат ойынынан аудан біріншілігі өтті.
Әр ауылдан жиналған қатысушылармен танысқаннан кейін, мемлекеттік Гимн орындалды. Әрі қарай шара қонағы ЖРО басшысы Дәурен Мерешов пен аудандық БЖСМ директорының орынбасары Дәурен Жағыпаров сөз алып, қатысушыларға сәттілік тіледі.
Ақыл-ой мен жүйріктік сынға түсетін додада бақ сынаушылар саны көп болмады. Десе де ойын қызығы қатысушыларды баурап, тартысты өтті.
Нәтижесінде Абай атындағы жалпы орта білім беретін мектебінің намысын қорғаған Жанарыс Құрманғали 3 орынды иеленсе, Айымбек Сарымсақов (Жаңақала жалпы орта білім беретін мектебі) 2 орынды қанжығасына байлады.
Мәстексай ауылынан келіп, жан-жақтылығымен танылған Ақеділ Ғұбашев үздік біріншілікке табан тіреді.
Барша қатысушыларға дипломдар мен сыйлықтар табыс етілді.
Ақерке Ғилымхан
Жаңақала ауданы
