Бүгін БҚО мәдениет, тілдерді дамыту және архив ісі басқармасының қолдауымен Қадыр Мырзалиев атындағы облыстық мәдениет және өнер орталығы мен Сырым ауданы әкімдігі Мемлекеттік сыйлықтың иегері, Қазақстанның халық жазушысы, дарабоз ақын Қадыр Мырза Әлінің шығармашылығын насихаттауға арналған «Қадыр-Қазына» жобасы аясында мектеп мұғалімдері мен оқушылары арасында дәстүрлі «Қадыр оқулары – 2024» республикалық байқауын ұйымдастырды.
Шара мақсаты – жас ұрпақтың поэзияға деген құштарлығын арттырып, патриоттық сезімдерін ояту және ұстаздар арқылы қазақ әдебиеті кеңістігінің дамуына үлес қосу. Үш кезеңнен құралған байқауға өңіріміздің түкпір-түкпірінен бірнеше үміткер қатысып, сынға түсті. Облысымыздың атынан өнер көрсеткен Жаңақала мектеп-гимназиясының 11-сынып оқушысы Абайұлы Аймырза өткен жылы аталмыш байқаудың облыстық кезеңінен бас жүлде алып, республикалық кезеңіне жолдама алған болатын. Биыл да сайыс шарты бойынша ақынның 100 өлеңін жатқа білетін Аймырза ақын, «Алаш» сыйлығының иегері Айтқали Нәріков, белгілі жұбантанушы, ақын Үзілдік Елубайқызы, айтыскер ақын Айнабек Бисенғалиев секілді елімізге елеулі тұлғалар қазылық еткен додада үздік деп танылды. І орынды қанжығасына байлаған жас өрен Жаңақаланың ғана емес, облысымыздың абыройын аспандатты.
Одан бөлек ұстаздар арасында тартысты өткен бәйгеде Аймырзаның жетекшісі, қазақ тілі мен әдебиеті пәнінің мұғалімі, Қазақстан Журналистер одағының мүшесі, ақын Жанайдар Болатбекұлы да алғысхатпен марапатталып, халық қошеметіне ие болды.
Айзада Ақбасова,
Жаңақала ауданы
