Бүгін Жаңақала аудандық мәдени-демалыс орталығының сахнасында «Алдар көсе мен шайтандар» қазақ халық ертегісінің премьерасы өтті. Кішкентай көрермендерге алғаш рет ұсынылған қойылым мәдениет үйінің режиссеры Қырымбек Тұрақбаевтың жетекшілігімен дайындалды.
Ертегі оқиғасында Алдар көсенің Құлан мен Түлен атты екі шайтанды ақылымен, айласымен арбап, өзіне бағындырғаны баяндалды. Балаларға ертегі қойылымының ұнағаны соншалық, селт етпей, бір деммен тамашалады.
Шара соңында сөз алған мәдениет үйінің басшысы Мұхит Батырханұлы баланың ой-қиялын дамытатын, тәрбиелік мәні зор мұндай шаралар әлі де жалғасын табатынын жеткізіп, ертегі кейіпкерлерін керемет сомдаған әртістерге гүл шоқтарын табыс етті.
Асылым Ерғали, 4-сынып оқушысы: Маған бүгінгі ертегі қойылымы ұнады. Әртістер өз рөлдерін тамаша алып шықты. Келесіде «Мақта қыз», «Алтын балық» ертегілері сахналанғанын қалаймын.
Айназым Мерханқызы, 4-сынып оқушысы: Бұрын мәдениет үйіне мультфильм көруге келетінмін. Бүгін “Алдар көсе мен шайтандар” қойылымын тамашаладым. Маған ұнады. Олардың дауыстары, киімдері мен іс-қимылдарынан Алдар көсе мен шайтандарды шын өмірде көргендей болдым. Осындай ертегілер сахналанып тұрса, тағы да келер едім.
Айзада Ақбасова,
Жаңақала ауданы
