Бүгін Жаңажол ауылдық округінде АЭС салудың маңыздылығы жөнінде түсіндірме жұмысы ұйымдастырылды. Кездесуде халықтық штаб мүшелері Қуаныш Шарафутдин және аудандық мәслихат депутаты Дәурен Жағыпаров көптің көкейінде жүрген сауалдарға жауап берді.
Басқосу барысында штаб өкілі Қуаныш Шарафутдин АЭС артықшылықтарын айтып қана өтпей, құрылымы бойынша сөз қозғап, халқымыздың санасына қорқынышты ұялатқан сыртқы елде болған апаттардың себептерін ашып айтып, келісім болған жағдайда болашақта орнатылатын жоғары деңгейлі атом энергетикасы қондырғыларының қауіпті тудырмайтындығына тоқталып өтті.
Өз кезегінде халықтық штаб мүшелері Президенттің жалпыхалықтық референдум өткізу бастамасын қолдап, АЭС еліміздің әлеуметтік ахуалын дамытуға үлкен ықпал ететінін пайымдады.
Сонымен қатар, ауыл тұрғындары Республикалық референдумда өз таңдауларын жасайтындығын жеткізді.
Фариза Эдикқызы,
Жаңақала ауданы
