Ақжайық ауданының Алғабас ауылдық округіне қарасты Жаңажол ауылында медициналық пункт күрделі жөндеуден өтіп, пайдалануға берілді.
372 тұрғыны бар елді мекеннің қуанышын бөлісуге облыстық денсаулық сақтау басқармасының басшысы Ерлан Тоқсанов пен аудан әкімі Қалияр Айтмұхамбетов арнайы барды.
– Денсаулық – әр адамның баға жетпес байлығы. Үкімет тарапынан осы бағытта көп іргелі істер қолға алынуда. Жарқын мысалдарды біздің ауданнан да келтіруге болады. Қазіргі уақытта осыдан бөлек тағы үш ауылдың медициналық нысандары күрделі жөндеуден өтіп жатыр. Қаржы бөліп, қолдау көрсеткен облыстық денсаулық сақтау басқармасына ақжайықтықтар атынан ризашылық білдіремін. Қуаныштарың құтты болсын, дендеріңізге саулық тіледім. Бұл нысанды игіліктеріңізге пайдаланыңыздар, – деді аудан басшысы.
Осыдан кейін басқарма басшысы Ерлан Виленұлы сөз сөйлеп, өзінің жылы лебізін арнады. Әрмен қарай салтанатты ашылуға жиналған қауым жаңа медициналық пунктті аралап көрді.
Айта кету керек, 2005 жылы бой көтерген медициналық пунктті жөндеу бір ай жарым уақыт жүріпті. Мердігері – «DIZAIN-D.A» ЖШС. Бөлінген қаражат – 18 751 238,02 теңге. Сарман мен Шабдаржап ауылдарындағы медициналық нысандары күні ертең жаңа кейіппен пайдалануға берілмек. Ал Тайпақ ауруханасында күрделі жөндеу жүргізіліп жатыр.
Азамат Қанапия,
Ақжайық ауданы
zhaikpress.kz
