Бүгін Жәнібек ауданы әкімдігінде аудан әкімі Тимур Шиниязовтың төрағалығымен жиын өтті. Тимур Серікұлының 2025 жылдың 3 наурыздағы №26-ө өкімімен әлеуметтік, мәдениет, құрылыс, тұрғын үй, коммуналдық шаруашылық, жолаушылар көлігі және автомобиль жолдары салаларына жетекшілік ететін аудан әкімінің орынбасары лауазымына Жаннұр Ахметов тағайындалды.
Аудан басшысы Жаннұр Бекбауұлының өмірбаянымен таныстырып, жұмысына сәттілік тіледі. Өз кезегінде Ж.Ахметов міндеттелген жұмысты абыроймен әрі қоян-қолтық атқаратынын жеткізді.
Жаннұр Бекбауұлы 1986 жылы 20 ақпанда Казталов ауданы Бостандық ауылында дүниеге келген.
2010 жылы Батыс Қазақстан инженерлік гуманитарлық университетін «Қаржы», 2018 жылы Жәңгір хан атындағы Батыс Қазақстан аграрлық-техникалық университетін «Мемлекеттік және жергілікті баскару магистрі» мамандықтары бойынша бітірген.
Еңбек жолын 2006 жылы Оралдағы «Батыс арна» ЖШС-да менеджер болып бастаған.
Әр жылдары «СтройИнвест АБЕ» ЖШС директорының орынбасары, «Батыс Қазақстан ғылыми зерттеу институты» мекеме директорының орынбасары, Ақжайық ауданы әкімі аппаратының ұйымдастыру-бақылау және кадрлармен жұмыс бөлімінің бас маманы, Орал қала әкімі аппаратының құжаттамалық қамтамасыз ету және қаржылық шаруашылық жұмысы бөлімінің бас маманы, Ақтау қалалық ішкі саясат бөлімінің бас маманы, Орал қаласының Зашаған кенті әкімі аппаратының абаттандыру бөлімі басшысы, Тасқала ауданы Тасқала ауылдық округінің әкімі, Теректі ауданының тұрғын-үй коммуналдық шаруашылығы, жолаушылар көлігі және автомомбиль жолдары бөлімінің басшысы, Теректі ауданының ішкі саясат бөлімінің басшысы, Теректі ауданы Ақсуат ауылдық округінің әкімі лауазымдарында қызмет атқарған.
Күні бүгінге дейін Батыс Қазақстан облысы қоғамдық даму басқармасының этносаясат және азаматтық қоғамды дамыту бөлімінің басшысы қызметінде жұмыс істеген.
Отбасылы, төрт бала тәрбиелеп отыр.
Гүлзара Мәди,
Жәнібек ауданы
zhaikpress.kz
