Бүгін ҚР Президенті Қ.Тоқаевтың «Халық үніне құлақ асатын мемлекет» тұжырымдамасын іске асыру аясында ауданда «Ашық әкімдік» азаматтарды қабылдаудың бірыңғай күні өтті.
Аудандық мәдениет үйінде өткен қабылдау шарасына аудан әкімі Тимур Шиниязов, аудан прокуроры Асқар Мереке, аудандық полиция бөлімінің басшысы Мейрамхан Бапахов және өзге де аудан әкімдігіне қарасты бөлім, мекеме басшылары қатысты.
«Ашық әкімдікке» аудан орталығынан бөлек көршілес Ақоба, Ұзынкөл, Күйгенкөл ауылдарынан келген ұзын саны 16 тұрғын, аудан басшысына өз уәждерін жеткізді. Тұрғындар тарапынан қойылған сауалдардың басым көпшілігі тұрғын үй, жер қатынастары, жұмыспен қамту, қоғамдық көліктердің қызмет сапасын жақсарту мен бағасын тұрақтандыру, әлеуметтік қамсыздандыру салаларына қатысты болды.
Тимур Серікұлы айтылған мәселелерді жауапты бөлім басшыларымен бірге талқылап, ешкімді жауапсыз қайтармады. Барлық көтерілген мәселелердің шешімі мен қойылған сұрақтардың жауабы заң аясында қарастырылатындығын жеткізді. Уақыт күттірмейтін жеке мәселелермен келген кей тұрғындардың уәждері қабылдау барысында оң шешімін тапты.
Айта кету керек, «Ашық әкімдік» іс-шарасы халықта туындайтын өзекті мәселелерді жедел және тиімді шешуге ықпал етуді көздейді. Аты айтып тұрғандай, халық пен басшылықтың арасындағы диалогтың бүкпесіз ашық болуы, өзара сенімнің нығаюына сеп болары сөзсіз.
Арай Сейфолла
Жәнібек ауданы
