Кеше облыс әкімдігінде өткен жиналыста облыс әкімі Нариман Төреғалиев пен «Green Spark Limited» ЖШС өкілі Marco Cactagini мырза келісімшартқа отырды.
Өңірдегі Жәнібек және Бөкей ордасы аудандарының электр қуатын Ресей федерациясынан алатыны белгілі. Қос ауданның халқы 5 мегават электр қуатын тұтынады. Егер станса іске қосылса, ең алдымен, өңірдегі энерготәуелсіздікті қамтамасыз етпек. Италиялық инвестормен келіссөз барысында өңір басшысы Нариман Төреғалиұлы бұл жобаның екі аудандағы электр қуатының бағасын арзандатуға, жергілікті электрмен қамтуға мүмкіндік беретінін атап өтті.
– Біздің компания халықаралық деңгейде жұмыс істейді. Италияда, Сербияда және Африкада жобаларымыз бар. Алайда негізгі қызметімізді Бөрлі ауданындағы Ақсай қаласында бастадық. Біздің басты тұтынушымыз – Қарашығанақ кен орны. Жобаны қауіпсіз әрі тез жүзеге асыруға барымызды саламыз, – деді Marco Cactagini мырза.
Облыстық энергетика және тұрғын үй-коммуналдық шаруашылық басқармасының басшысы Мирас Мүлкайдың айтуынша, стансаны орнату үшін Жәнібек ауданының Өнеге ауылында 20 гектар жер анықталған. Бұл гибридті станса болады. Яғни жартылай күн сәулесінен қуат алады, жартылай газбен де жұмыс істейді. Оны жеке инвестор қаржыландырады. Ал жергілікті атқарушы құрылым осы стансадан өндірілетін электр энергиясын толық сатып алуға кепілдік береді. Жоба екі жыл ішінде жүзеге аспақ.
«Біз үшін маңызды құжатқа қол қойылды. Себебі Ресейдің қос облысымен шектесіп жатқан аудан сол елден келетін электр қуатын тұтынып отыр. Қазір ауданда 4300 абонент бар», – деді Жәнібек ауданының әкімі Тимур Шиниязов.
Гүлзара Мәди
Жәнібек ауданы
