Бүгін аудандық мәдениет үйінде «Жәнібек дауысы – 2024» ән байқауының іріктеу кезеңі өтті. Аудандық демалыс орталығының ұйымдастырумен және «Ақбастау» жастар қоғамдық бірлестігінің қолдауымен бастау алған жобаның мақсаты – таланттарға қолдау көрсету және өнер жолында жаңа есімдер ашу.
«Жәнібек дауысы» - әлемнің 180 елінде тараған «The Voice» телешоуының қазақша нұсқасы. Байқаудың бір ерекшелігі - көрмей тыңдау. Бұл - қазылар алқасын ойландырып, әбден әуре-сарсаңға салып, сараптама жасайтын жоба. Байқауда әділ бағасын беретін және іріктеу кезеңінен өткен үміткерлерге жетекшілік ететін тәлімгерлер - Райымбек Кәрімов, Шынар Қаюпова, Аслан Боранбаев, Жандос Темірғалиев. Дода үш кезеңнен тұрады.
Алғашқы іріктеу кезеңінде қазылар алқасы көрмей тыңдаса, екінші кезеңде үміткерлер тәлімгердің берген тапсырмасы бойынша ән орындайды. Ал соңғы шешу кезеңде байқауға қатысушылар тәлімгермен және өзі жеке бір әннен орындайтын болады. Аталмыш өнер бәйгесі бұрынғыдан мүлдем өзгеше, ерекше форматта басталды. Аудан өнерпаздары Шынар Шәбиденқызы, Райымбек Асылбекұлы, Анаргүл Молдашева, Райымбек Нұрғалиев, Асылжан Дәулетов және Жеңісбек Жүсіпов қазақ эстрадасындағы танымал әндерден попурри орындап, тыңдармандарға естен кетпес керемет әсер сыйлады.
Он сегізге жуық қатысушыдан келесі кезеңге он екі үміткер өтті. Жоба әр апта сайын Жәнібек ауданының тұрғындарымен қауышады.
Айсұлу Жұмабай,
Жәнібек ауданы
