Жәнібекте жаңа оқу жылы қарсаңында А.Оразбаева атындағы негізгі мектеп жанынан жаңа асхана ашылып, қолдануға берілді.
Айта кету керек, аталмыш мектепте асхана болмаған. Сондықтан бұрынғы спорт залы күрделі жөндеуден өтіп, асханаға бейімделіп салынды. Күрделі жөндеу жұмыстарын Орал қаласындағы «Dizain» ЖШС атқарды.
Салтанатты шарада аудан әкімі Азамат Сафималиев асхананың мердігері Оразбек Мұхамбетовке ауданның әлеуметтік-экономикалық дамуына үлес қосқаны үшін тұрғындар атынан рақметін айтып, алғысхат табыстады.
Өз кезегінде ардагер ұстаз Бәтима Меңдешқызы сөз алып, мемлекет тарапынан балалардың тамақтануы үшін мектептерге лайықты қолдауға ризашылығын білдіріп, жаңа асхананың бой көтеруімен ұстаздар мен оқушыларды құттықтады.
Ақжарма тілектерден соң аудан басшысы Азамат Сафималиұлы мен ардегер ұстаз Бәтима Меңдешқызы лента қиып, қонақтар жаңа асхананы көрді.
– Осыған дейін мектепте арнаулы асхана болған жоқ. Оқушылар тамақтану үшін жасақталған бөлмеде ауқаттанатын. Әлемді әуреге салған індет жойылып, оқушыларымыз бұрынғыдай мектепке келіп оқыған кезде жаңа асханадан тамақтанатын болады, – дейді мектеп директоры Тахир Мусинов.
zhaikpress.kz
