Бүгін мемлекет және қоғам қайраткері, КСРО Журналистер одағының мүшесі Рахметолла Егізбаевтың 100 жылдығына арналған облыстық ғылыми-практикалық конференция басталды.
Аудандық мәдениет үйінде өтіп жатқан конференция қонақтарын «Жәнібек сазы» халықтық-фольклорлық ансамблі әдемі әуенмен қарсылап алса, конференция қатысушылары фойеде ұйымдастырылған көрмемен танысты.
Қонақтар қатарында М.Ықсанов атындағы қоғамдық қордың төрағасы Асқар Атаев, Р.Егізбаевтің немере қарындасы Айжан Егізбаева, Бөкей ордасы ауданы әкімінің орынбасары Кенесары Нұрша табылды.
Көрмені М.Мәметова атындағы облыстық мемориалдық музейі, аудандық тарихи-өлкетану музейі мен аудандық орталықтандырылған кітапханалар жүйесі дайындап, назарға ұсынды.
Конференция модераторы М.Мәметова атындағы облыстық мемориалдық музейдің меңгерушісі Ахмедияр Батырханов «қош келдіңіз» айтып, спикерлерді таныстырды.
Алғаш боп аудан әкімі Тимур Шиниязов Рахметолла Сүйіндікұлының өмір жолы мен қайраткерлігі туралы баяндама жасады.
Гүлзара Мәди
Жәнібек ауданы
