Жәнібекте жыл үздіктері марапатталды

Биыл ауданымыз үшін жағымды жаңалыққа толы жыл болды. Әр салада жеткен жетістіктер мен жасалған игі істерге – ел куә. Облыс орталығымен қатынайтын күре жолдың толықтай пайдалануға берілуі, аудан халқын сапалы ауыз сумен қамту мақсатында аудан бойынша жобалар жүзеге асырылып, 18 елді мекеннің 16-сы ауыз сумен қамтылуы, Қамысты, Борсы ауылдарында фелдшерлік амбулаториялық пункттер салынып пайдалануға беріліп, аудан орталығына 10 жас маман келіп, 4 ауылға жедел жәрдем көлігі берілді. Тұрғын үйлер, кіреберіс жолдар салынып жатыр. Ал осы жеткен жетістіктер мен игі істердің артында адал еңбек пен маңдай тер жатыр.

Сол себепті жылдағы дәстүр бойынша ауданымыздың дамуына айрықша қызмет еткен жыл үздіктері сахна төріне шақырылып, оларды аудан әкімі Тимур Шиниязов марапаттады.

Аналар кеңесінің мүшесі, медиатор, ардагерлер ұйымының белсендісі және ұстаз ардагерлер алқасының мүшесі Гүлнәр Хайырлиева – «Үздік қоғам белсендісі», ат спортына демеушілік көрсетіп, өңірде атқарылып жатқан мәдени және спорттық шараларды қолдауға белсене атсалысып жүрген шаруа қожалық иесі Нұрболат Шагиров – «Үздік ауыл шаруашылығы қызметкері», аудандық жұмыспен қамту және әлеуметтік бағдарламалар бөлімінде жалғызбасты жандар мен мүмкіндігі шектеулі балалармен жұмыстану жөніндегі әлеуметтік кызметкер болып қызмет атқарып жүрген Эльмира Матаева – «Үздік әлеуметтік қызметкер», кәсіпкерлік саласын дамытуда үздік көрсеткіштерге қол жеткізіп, өз ісінің білгір маманы Ерлан Атаев – «Үздік кәсіпкер», медицина саласында 27 жылдық еңбек өтілі бар, жоғары білікті санатты маман Меңсұлу Ғұсманова – «Үздік медицина саласының қызметкері», жоғары білікті өндірістік оқыту шебері, өз саласында қажырлы еңбегімен, білім беру ісіндегі үздік жетістіктерімен ерекшеленіп, көптеген жастарды кәсіби тұрғыда тәрбиелеп жүрген Асылжан Аймурзин – «Үздік өндірістік оқыту шебері», ұзақ жылдар бойы мемлекет үшін еңбек ету мен оның әлеуметтік мәселелерін шешуге арнаған Райгүл Тастенова – «Үздік мемлекеттік қызметкер», полиция қызметінде еңбек өтілі мол, жоғары біліктілік, адалдық және жауапкершілік танытып, азаматтардың кауіпсіздігін қамтамасыз ету жолында ерекше үлес қосып жүрген Нұфтығали Төрешов – «Үздік полиция қызметкері», білім беру саласындағы еңбегі мен тәжірибесі мол маман Толқын Кисекова – «Үздік білім саласының қызметкері», кәсіби әнші, ұлт-аспаптар оркестрінің бас домбырашысы, халық театрының әртісі әрі Кәрімовтер отбасылық ансамблінің мүшесі Алтынбек Каримов – «Үздік мәдениет қызметкері», азаматтық қорғау саласында ұзақ жылдар бойы қызмет етіп, өзінің кәсібилігі мен адалдығын танытқан Жақсылық Есентаев – «Үздік азаматтық қорғау қызметкері», футбол үйірмесін ашып, жасөспірімдерге футбол ойынын үйретіп, жас болса да жетістіктерге қол жеткізген Дастан Әбдірешев – «Үздік спортшы» аталымдарымен марапатталды.