Бәйтерек ауданының Зеленый ауылдық округіне кіре беріс жол мен Гагарин және Тәуелсіздік көшелерінің жарық шамдары жаңартылды. Жарықтандыру жұмыстарын жүргізген мердігер компания жетекшісі Артур Рахимовтың айтуынша, олар маусым айының басында жұмысты бастаған, бүгінде жарықтандыруды аяқтауда.
- Бізді алаңдатқан негізгі мәселе желі тарту болды. Алдымызда жер асты арқылы немесе бағаналардың бойымен деген қос таңдау тұрды. Кеңесе келе, қыста тоң қалыңдайтынын, грейдерлер мен асфальттарды тазарту жұмыстары жүргізілетінін, токтың тұйықталу ықтималдығын ескеріп, екінші нұсқаға тоқтадық. Жұмыс процесінде жарықты өшіру сынды аз-кем қолайсыздықтар орын алды. Бұл мәселені округ әкімі аудандық электр желісі мекемесі мамандарымен бірлесіп тиянақтап берді. Алдын ала қай күні келеміз, қай күні желі өшетінін талқыладық. Өздеріңіз білесіз, жаз мезгілі, күн ыстық. Тоңазытқыштарды ұзақ уақытқа өшіре алмаймыз. Жалпы жұмыс кезінде ауа райы қолайлы болды. Бізге барынша қолайлы жағдай жасауға ұйытқы болғаны үшін жергілікті атқарушы билік құрылымдары мен ауылдағы қоғамдық кеңес және жұртшылық өкілдеріне ризашылығымызды білдіреміз,- деді Артур Ұпайұлы.
Зеленый ауылдық округі әкімі Ізғали Дәулетовтың сөзіне қарағанда, бүгінде 800 метр кіре беріс жол мен қос көшедегі ескі жарық шамдары түгел жаңартылды. Жұмыс үдерісін ауыл тұрғыны, қоғамдық кеңестің төрағасы Зейнолла Тасмуханбетов жіті қадағалауда.
Сәлім Мәмбеталиев,
Бәйтерек ауданы
zhaikpress.kz
