Жалпақтал ауылындағы Мәдениет үйінде Тәуелсіздік күніне арналған Казталов ауданы көркемөнерпаздары ұжымының біріккен театрландырылған көрінісі қойылды.
Сахна төріндегі экраннан көрініс тапқан бейнебаян мен театр шеберлері сомдаған батыл рөлдер мен рухты билер абыз қарияның қазақтың киелі жері мен қасиетті топырағы туралы толғаған толғауына ұласып, көрермендердің арқасын бір қозғап, қанаттандырып қойды. Тәуелсіздікті аңсаған еркін елдің басына азаттықтың оп-оңай қонбағанын бейнелеген театр әртістері бір уыс топырақты қызғыштай қорғаған батыр тұлғалардың өжеттігін шебер көрсете алды.
Қойылым барысында мың бұралған би мен көркем компазиция сәтті жалғанып, биші қыздар мен ер жүрек батырлар арасынан Керей мен Жәнібек хан шығып «Рақымы мол Алла қазақ елін арманы биік ақ жолға бастасын» деп ұрандатты. Артынан сахнада «Батырлар жыры» әні орындалады.
Осылайша қазақ елінде болған ашаршылық, ондағы акапелла көрінісімен бейнеленген 1940 жылдардағы бесік жыры, аштықтан бұратылған қолында сәбиі бар ананың «азаттық алар күн қашан туар екен?» деген зарлы үні, аштықтан жылаған баланың шыңғырған дауысы үзіліп, шетінеп кеткені қойылымда көрініс тауып, адам жанын шымырлатты.
Одан кейінгі көріністерде Алаш қайраткерлерінің қайсарлығы мен «Он төрт» оқиғасының көріністері экраннан толық көрсетіліп, олар туралы шумақты поэзиялар оқылды.
Кезек соғыс тақырыбына келгенде сахнадан театр әртістерінің орындауында «Пошта келген сәт» көрінісі сахналанып, көрерменнен оң бағасын алды. Онда театр әртістері Төлеген Тоқтаровтың ерлікпен қаза болған хабарын шынайы сомдап, сұм соғыстың зардабын бірден ұғындыра алды.
Осы тұста ауыл театрының белді мүшесі, танымал термеші Бейбіт Оразов Рамазан Елебаевтың «Жас қазақ» әнін орындап, үлкен ілтипатқа бөленді.
Осыдан кейінгі қойылымдар Қазақстандағы ядролық жарылыстар мен Желтоқсан оқиғасына арналып, ең соңында Егемен еліміздің көк туын желбіретіп, азаттықтың ақ таңы атқан Қазақстан Республикасының Тәуелсіздік күнімен қорытындыланды.
Қыдыр Харесұлы
Казталов ауданы
