Орал қаласындағы П.Атоян атындағы стадионда жеңіл атлетикадан Бәйтерек ауданының ашық біріншілігі өтті. Жастарды салауатты өмір салтын ұстануға шақырып, спортты соның ішінде жеңіл атлетиканы насихаттау мақсатында ұйымдастырылған желаяқтар додасына Орал қаласы мен алыс-жақын аудандардан келген спортшылар қатысты.
– Бәйтерек ауданында жеңіл атллетика жақсы дамып келеді. Қазіргі таңда бірнеше жас спортшымыз Шығыс Қазақстан облысындағы спортқа дарынды балаларға арналған О.Рыпакова атындағы арнайы интернатта оқып жүр. Жыл сайын сайын нәтижелеріміз де өсіп келеді. Болашақта ел атынан әлем чемпионаттары мен олимпиада ойындарына қатысатын спортшы баптап шығарсақ деген мақсатымыз бар, – дейді жарыс бапкері Жарас Айтуаров.
Бірнеше жас ерекшелігі бойынша бақ сынасқан жеңіл атлеттер сайысының қорытындысында 9-10 жасар ер балалар арасында Жоламан Төлепбергенов алдына жан салмаса, осы жастағы қыздар сынында Виктория Прохорова жеңімпаз атанды. 11-13 жасар спортшылар сынында Надежда Беспалова мен Ярослав Келазев мықтылық танытты. Сондай-14-15 және 16-17 жастағы спортшылар да жарыс көркін қыздырды. Жасөспірімдер сынында Артем Градинар үздік деп танылса, 14-15 жасар қыздар жарысының жеңімпазы атағы Виктория Глотованың қанжығасында кетті.
Жарыстың ең қызық сәті 16-17 жастағы ерлер мен қыздар бәсекесінде болды. Жеңіл атлетиканың барлық құйтырқылығын меңгерген, қарсыластың шаршағанын немесе жылдамдығын сәл бәсеңдеткенін сезетін шеберлер сайысы тартысқа толы болды. Осы кезге дейін жарыс алдын бермеген Владислав Сурко, Айдар Ғалиев, Мария Борокова, Дамира Ерсайынова, Злата Виноградовалар жеңіл атлетика, соның ішінде жүгіру спортының қандай болатынын көрсете алды. Қорытындысында 16-17 жасар қыздар сынында Дамира Ерсайынова жеңімпаз атанса, ер балалар бәсекесінде Айдар Ғалиев бірінші болып мәре сызығын кесіп өтті.
Түгелбай Бисен,
Бәйтерек ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
