Жуырда Татарстанның Қазан қаласында IX ашық республикалық 100 адам жобасы аясында "Жиганов - Vivo" фестиваль байқауы өтті.
Фестивальге сырымдық жас өнерпаздар да шақырылып, геосаяси жағдайға байланысты онлайн қатысуға мүмкіндік алды.
- Ауа-райының қолайсыздығына байланысты қашықтан қатысуға мүмкіндік берген ұйымдастырушыларға алғысымыз шексіз. Қазылар алқасының шешімімен шәкірттеріміз жүлделі орындарға ие болды,- дейді талантты шәкірттердің ұстазы Әсел Бисенғалиева.
Айгүл Сапаралиева мен Әсел Бисенғалиеваның үлкен топтағы шәкірттері домбыра-фортепиано ансамблі бойынша ІІ дәрежелі, орта топтар арасында ІІІ дәрежелі лауреат атанса, фортепиано-дуэт бойынша Әсел Бисенғалиеваның оқушылары ІІІ дәрежелі, жеке фортепиано ойнауда орта топтар ішінен сырымдық оқушылар ІІІ дәрежелі лауреат иегерлері болып танылды.
Әсел Бисенғалиева Н.Жиганов шығармасы бойынша "Ең үздік өңдеу" методикалық жұмысының І дәрежелі лауреаты атанды.
- Өткен жылы фортепиано аспабы бойынша жүлделі орындарға ие болғандықтан, биылғы байқауға шақырылған едік. 2025 жылы мерейтойлық оныншы байқауға шақырту алдық. Саз мектебінің үйірме оқушыларымен 6 номинация бойынша 12 шығармамызды ұсындық. Өзім де музыкалық сауаттылық және методикалық жағынан үш жыл қатарынан қатысып, жұмысымды ұсынып келемін,- дейді А.Ғұбайдуллин атындағы балалар саз мектебінің фортепиано сыныбы жетекшісі Ә.Бисенғалиева.
Оралда дүниеге келген композитор - пианист Назиб Жигановтың музыкасын насихаттау бағытында өткен фестиваль нәтижесіне куә болып отырмыз.
Келер жылы аталған мерейтой қарсаңындағы байқауға сырымдық оқушылардың Татарстанға барып қатысуына мүмкіндігі болса, нұр үстіне нұр болар еді.
Қашықтан қатысып, жүлделі орын алған шәкірт Қазан қаласының сахнасында өзге мемлекеттің талантты балаларымен иық тірестіре қатысып, жүлде еншілесе шәкірттің ғана емес, оны баптаған ұстаздың да, қолдау көрсеткен ата-ананың да мерейі үстем болмай ма?!
Айжан Бауыржанқызы,
Сырым ауданы
zhaikpress.kz
