Жас буынның сапалы білім алуымен қатар қауіпсіздігі де негізгі орынға шықты. Қазіргі уақытта Сырым ауданы, Жосалы ауылдық округінің орталығындағы мектепке 6 шақырым Тамды ауылынан 21 оқушы тасымал арқылы оқытылады.
Қос ауылдың арасына күнбе-күн қатынайтын «автобустың» тозығы жеткені рас. Ыңыранып, әрең кетіп бара жатқанын көзіміз де көрді. Бір кез аудандық газет бетіне «Терминатор – автобус» деген мақала да жаздық.
Қуанышты жаңалық сол, А. Жұмағалиев атындағы мектеп – бөбекжай – балабақша кешеніне БҚО Білім басқармасы тарапынан «ПАЗ» маркалы су жаңа автобус берілді.
- Көліктің кілтін директор Әскербек Тажғалиевке Сырым ауданы әкімінің орынбасары Артур Шерғалиев табыстад, - деп жазады аудандық білім беру бөлімінің Facebook желісіндегі ресми парақшасы.
Шараға аудандық қоғамдық келісім кеңесінің төрайымы Шынар Дүйсенгалиева, білім беру бөлімінің басшысы Әділ Ахмет қатысты.
Бауыржан Ширмединұлы,
Сырым ауданы
zhaikpress.kz
