Қазақстан Республикасы Тәуелсіздігінің 30 жылдығына орай, «Нұрлы жер» бағдарламасы аясында пайдаланылуға берілген Қаратөбе ауданы Жусандыой ауылының ауылішілік су құрылысының ашылу салтанаты өтті.
Жусандыой ауылының халқын қуанышқа кенелген қуанышты сәтті бөлісіп, құттықтау сөз сөйлеген аудан әкімі Қадыржан Сүйеуғалиев:
– Жұртшылық үшін аса маңызды болып отырған ауыз су мәселесі жыл өткен сайын оңтайлы шешімін тауып келеді. Күрмеуі қиын түйткілді мәселелер мемлекеттік бағдарламалар аясында шешімін табуда. Қай кезде болмасын ауыз судың сапалы болуы маңызды. Су – тіршілік көзі. Халық денсаулығының мықты болуы да таза ауыз судың сапасына байланысты.
Аудан көлемінде, оның ішінде, ауылдық eлді мекендерді орталықтандырылған сумен жабдықтау бойынша соңғы жылдары бірқатар ауқымды жұмыстар жүзеге асырылуда.
Соның бірі – Жусандой ауылындағы ауылішілік су құбыры құрылысы. Аталған жоба ауыл тұрғындарын сапалы ауыз сумен қамтамасыз ете отырып, тұрғындардың әл-ауқатын көтерері сөзсіз, – деді.
Жусандыой ауылының ауылішілік су құбыры құрылысын жүргізген мердігер компания «Сәт-Сервис» ЖШС. Аталған ауылішілік су құбырының құрылысы 2019 жылы басталған болатын. Жоба құны – 285,4 млн. теңгені құрайды. Құрылыс жұмысы уақытша тоқтатылып, қайта жалғасқан су құбыры құрылысының жұмысы аяқталып отыр. Жалпы ұзындығы 13 шақырым 140 метрді құрайтын су құбыры желісі пайдаланылуға берілді. Бұл жоба Жусандыой ауылының халқын таза ауыз сумен толықтай қамтитын болады.
Мерекелік шарада жусандыойлықтарды ауылішілік ауыз су құбырының ашылуымен еңбек ардагері Сағат Нұриев құттықтап, аудан басшысы Қадыржан Орынбасарұлы екеуі ауыз су құбырын іске қосу рәсімін жүргізді.
Серікбай Хасанов,
Қаратөбе ауданы
zhaikpress.kz
