Сырым ауданына қарасты Жымпиты ауылының тұрғыны, еңбек ардагері Еркін Жақсыгереевтің 90 жасқа толуына орай құрмет көрсетілді.
Еркін Жақсыгереев – Алматы тау-кен институтын инженер-геолог мамандығы бойынша бітіріп, Қостанай қаласында он жылдай жемісті еңбек етті.
Кейінгі жылдары ол аудандық атқару комитетінде нұсқаушы, аудан орталығындағы құрылыс саласында “ПМК” инженер, аудандық обаға қарсы күрес мекемесінде бухгалтер қызметін атқарып, зейнеткерлік демалысқа шықты.
Өзіне тапсырылған жұмысты абыройлы атқарып, кейінгі буын жас ұрпақ айта жүрерліктей із қалдырған Еркін Жақсыгереевтің есімі бүгінде құрметке лайық.
Еңбек ардагерінің шаңырағына арнайы келген Жымпиты ауылдық округі әкімінің орынбасары Қайрат Абсатыров, аудандық ардагерлер кеңесінің төрағасы Мүсірбек Айташев, Жымпиты ауылдық ардагерлер кеңесінің төрағасы Ғилаж Қаналиев аудан әкімі Жұмагелді Батырниязовтың мерейтой иесіне арнаған құттықтау хатын, сый-сияпатын табыс етіп, Еркін ағаға жылы лебіздерін білдірді.
Сондай-ақ, Е.Жақсыгереев зейнеткерлік демалысқа шыққан аудандық обаға қарсы күрес мекемесінің ұжымы атынан келген мекеме қызметкерлері Арман Кеңесұлы, Армат Жұмабаев, Болатқали Жанболатұлы Еркін ағаны мерейлі жасымен құттықтап, құттықтау хат пен сый-сияпат тапсырды.
Арнайы келіп,мерейлі жасымен құттықтаған азаматтарға Еркін ақсақал ризашылығын білдіріп, ақ батасын берді.
Айжан Бауыржанқызы,
Сырым ауданы
Zhaikpress.kz
