Батыс Қазақстан облысы Кәсіподақтар орталығы жанынан Заң клиникасы жұмысы мамыр айында бастау алды. Осы уақыт ішінде клиникаға 50-ге жуық өтініш түсіп, шешілмеген түйін боп көрінгенмен, біреуі де сотқа жетпей өз шешімін тапты.
«Одақтар үйі» ғимаратында ашылған заң клиникасының басты мақсаты – кәсіподақ мүшелері үшін еңбек құқығы мәселелері бойынша ақысыз заңдық кеңес беру. Құрамында облыстық кәсіподақтар орталығының, салалық кәсіподақ ұйымдарының заңгерлері мен медиаторлар бар.
Жиі кездесетін өтініштер бюджеттік мекемелер өкілдері, кіші қызметкерлер мен медицина қызметкерлері тарапынан болды. Көкейкесті мәселелердің алды қызметкерлерге үстеме жұмыстың берілуі, мейрам күндері жұмысқа шақырылуы, еңбекақыны дұрыс төлемеу мәселелері, вакцинация алу сұрақтары. Әр сұрақтың шешімін табуда заңгерлер мен медиаторлар үлкен септігін тигізіп, шешу жолдарын көрсетуде.
Бүгінгі таңда заңнамалық көмекке жүгінген кәсіподақ мүшелеріне 5 қалалық емханасының директоры, Орал қалалық мәслихатының депутаты Тимур Ажғалиев азаматтық қабылдау өткізсе, сондай-ақ, Кәсіподақтар орталығының әлеуметтік әріптесі, медиация орталығының Батыс Қазақстан облыстық филиалының жетекшісі Махамбет Сұлтанғалиев өз кезегінде еңбек дауларын шешуге үлкен үлес қосуда.
Алдағы уақытта Заң клиникасында облыстық, қалалық маслихат депуттаттары, заңгерлер, әр саланың білікті мамандары қабылдау өткізуі жоспарлануда. Өзекті сұрақтары, шешілмеген түйіні бар жұмысшыларға Н.Назарбаев даңғылы 184/1 мекен жайында орналасқан Заң клиникасының есігі ашық екенін жеткіземіз.
