Осындай атаумен Тегеранда қазақстандық бүлдіршіндердің сурет көрмесі өтті.
Қазақстан Республикасының Иран Ислам Республикасындағы елшілігі қазақстандық «Аялаған алақан» қоғамдық қайырымдылық қорының бастамасымен және қолдауымен Тегеранның «Зәрна» көркемөнер галереясында «Әлем балалар көзімен» атты қазақстандық мүмкіндігі шектеулі балалардың сурет көрмесін ұйымдастырды, – деп хабарлайды ҚР СІМ баспасөз қызметі.
Аталған көрмеге мүмкіндіктері шектеулі балаларға көмек көрсететін «Аялаған алақан» қоғамдық қайырымдылық қоры (жетекшісі Рада Хайрушева) ұсынған бүлдіршіндердің суреттері қойылды. Қазақстан Республикасы Тәуелсіздігінің 30 жылдығына орайластырылған аталмыш көрменің басты мақсаты – қиындықтарға қарамастан, осы балалардың мүмкіндіктері шексіз екендігін, олардың ізгі ой-арманын, өмірге деген құштарлығын ашып көрсету.
Көрмеге қойылған туындыларды ирандық өнер, білім қайраткерлері, іскер топтары, ҚР азаматтары мен Ирандағы қазақ диаспорасының өкілдері тамашалады. Қазақстандық балалардың шығармашылығымен танысқан заң ғылымдарының докторы, профессор Саййед Хасан Амин, мүсінші Фатеме Асади және өзге де ирандық қайраткерлер қазақстандық ерекше балалардың шығармашылығынан олардың дүниеге іңкәр көзқарастарын анық көруге болатынын атап көрсетті.
Өз тілшіміз
