Оралда Республика күні қарсаңында бірқатар мерекелік салтанатты шаралар өтіп жатыр. Бүгін филармонияның камералық залында облыстық қылмыстық атқару жүйесі департаментінің ұйымдастыруымен сондай бір шара өтті.
Гимнмен басталған шарада облыстық қылмыстық-атқару жүйесі департаментінің басшысы, Әділет полковнигі Жүніс Әбдіқайыров әріптестеріне бірқатар мерекелік марапаттар табыс етті.
Одан бөлек, ішкі істер органдарында отыз жылдай еңбек еткен, Ішкі істер департаменті, қылмыстық атқару жүйесі департаментінде басшылық қызметте болған Манарбек Ғабдуллинді мерейлі зейнеткерлікке шығуымен құттықтап, құрмет көрсетті.
Салтанатты шара облыстық филармония ұжымы өнерпаздарының концертіне ұласты.
Концертте «Атамекен» халық би ансамблі, «Ерен еңбегі үшін» медалінің иегері Марат Сарбөпеев, республикалық конкурстардың лауреаты Айдана Ажғалиева, Омар Хибашев, Медет Оразов, Назира Хибашева, «Ерен еңбегі үшін» медалінің иегері Айбар Хайырханов өнер көрсетті.
Айжан Бауыржанқызы,
ҚР Журналистер одағының мүшесі,
Орал қаласы
