Бүгін аудандық ардагерлер үйінде «Ардагерлер ұйымы» РҚБ Жәнібек аудандық филиалының кеңейтілген отырысы өтті. Оған аудан әкімінің орынбасары Жақсылық Абдолов, «AMANAT» партиясы аудандық филиалының төрағасы Біржан Қуанәлиев, аудандық ішкі саясат бөлімінің басшысы Миранбек Ибатов, сондай-ақ бірқатар мекеме басшылары мен ардагерлер қатысты.
Жиын барысында аталған филиалдың төрағасы Амангелді Уәлиев өткен жылы бірқатар мекеме-қоғамдық ұйымдармен бірлесе отырып атқарылған жұмыстарды қысқаша баяндап, филиал тарапынан ұйымдастырылған мерекелік, атаулы күндерге арналған және мәдени-көпшілік, спорттық шараларға белсенді түрде атсалысқан аудандық мәдениет, тілдерді дамыту, дене шынықтыру және спорт бөлімінің басшысы Нұрболат Садырбаев, аудандық орталықтандырылған кітапханалар жүйесінің директоры Светлана Джукина, аудандық мемлекеттік архивтің директоры Жанар Қошанова, аудандық музей бөлімінің меңгерушісі Меңдігүл Фазылова, аудандық саз мектебінің директоры Жақсылық Бисенғалиев сынды азаматтар мен азаматшаларға шынайы алғысын білдірді. Сонымен қатар Амангелді Мырзағалиұлы филиалдың 2025 жылға арналған жұмыс жоспарын да таныстырып өтті. Онда биыл атап өтілуі тиіс басты мерекелердің қатарында Наурыз мейрамын кең форматта тойлау, сол сияқты Ұлы Отан соғысындағы Жеңістің 80 жылдығы мен ғұлама ойшыл Ғұмар Қараштың 150 жылдығын лайықты деңгейде атап өту де көрініс тапқан. Аудан әкімінің орынбасары Жақсылық Каримоллаұлы өз сөзінде ағымдағы жылы Ұлы Жеңістің 80 жылдығы мен Ғұмар Қараштың 150 жылдығын атап өтуге, басқа да мерекелер мен атаулы күндерге байланысты аудан бойынша мәдени-бұқаралық шаралардың жоспары бекітілгенін жиналғандар назарына ұсынып, таныстырып өтті.
Жиын барысында, сондай-ақ ардагерлер ұйымы жанынан «Әжелер алқасын» құру хақында Гүлнар Хайырлиева хабарлама жасады. «Даму» бағдарламасы бойынша облыстық өнер орталығының Жәнібек ауданында балалар үйірмесін ашу, аудандық ардагерлер кеңесінің төралқа мүшелерін сайлау туралы мәселелер қаралып, жиналғандар тарапынан бірауыздан келісілді.
Асқар Құсайынов
Жәнібек ауданы
