Аудан орталығындағы мәдени демалыс орталығында орналасқан N53 сайлау учаскесінде дауыс беру науқаны елең-алаңнан басталды.
Алдымен бюллетень салынатын жәшіктің бекітпе мөрлері (пломбы), дауыс беру кабиналарының жағдайлары тағы бір мәрте тексеріліп, дайындық соңғы рет пысықталды.
Таңғы 07:00-де учаскелік сайлау комиссиясының төрағасы Қуаныш Елеуов сайлау науқанын ашық деп жариялады.
Аудандық ардагерлер кеңесінің төрағасы Тілеген Арыстанбеков:
- Құрылтай сайлауы - еліміздің бірлігін, бір ту астында бір мүддемен тірлік етіп жатқан Қазақстан халқының азаматтық белсенділігін танытатын саяси науқан. Ауылдастарымды осы саяси маңызды күнде белсенді болуға шақырамын, - деді өз сөзінде.
Сайлаудың алғашқы сағаттарында ауысыммен жұмыс жасайтын азаматтарымыз бен шекарашыларымыз өз таңдауын жасады.
Аталған учаскесінде 1261 азамат дауыс беруге құқылы.
Сайлаушылар өз аумағындағы учаскелерге барып, сағат 20.00-ге дейін дауыс бере алады.
Айта кетсек, Бөкей ордасы ауданы бойынша 22 сайлау учаскесі жұмыс жасайды. 8650 сайлаушы тізімге алынған.
Анар Артықбай
Бөкей орда ауданы
