«Black Biotechnology» ЖШС-нің «AL KARAL» брендімен шығарылатын органикалық жем қоспалары мен тыңайтқыштарды өндіретін отандық өндіруші Латын Америкасы елдеріне экспорттауды жоспарлап отыр. Бұл туралы АШМ-нің баспасөз қызметі хабарлады.
Суреттер: АШМ
Компания өкілдерінің Аргентинаға сапары барысында осындай келісімге қол жеткізілді.
«AL KARAL» брендінің негізін қалаушы Асем Кенжебек жергілікті кәсіпкерлермен, Аргентинаның Ауыл шаруашылығы министрлігінің өкілдерімен, мемлекеттік органдармен бірқатар кездесулер өткізіп, гумин заттары негізінде жасалған инновациялық өнімдерін таныстырды.
«Біз өнімдерімізді жақын шет елдерге экспорттап келеміз. Енді Латын Америкасындағы ауыл шаруашылығының сапасын арттыруға және Қазақстанның органикалық өндіріс саласындағы халықаралық байланыстарын нығайтуға көмектесетін шығар деп үміттенеміз», - деді Асем Кенжебек.
Компания жоспарына сәйкес, келесі жылдың басында жаңа зауыт салынып, өндіріс пен өнімнің халықаралық сертификациясы аяқталғаннан кейін Аргентина мен Бразилияға экспорт басталады.
Еске сала кетейік, 2023 жылы «Black Biotechnology» ЖШС «Жасыл» ESG облигацияларын шығарған алғашқы ШОБ компанияларының бірі болды. 2023 жылдың қараша айында 2 миллиард теңгеге берілген облигациялардың купондық сыйақысы «Даму» қорымен субсидияланды, ал 75% кепілдігі Алматы ӘКК-сы берді. Табылған инвестицияларға Алматының индустриялық аймағында зауыт салынып жатыр, оны жылдың қараша айында аяқтау жоспарланып отыр.
