Жасөспірім биатлоншылар Ақмола облысы Сандықтау ауданынына қарасты Балкашино ауылында өткен ел чемпионатында кім мықтыны анықтады. 9 облыстан келген 200-ден астам мерген шаңғышы жарысқан бәсекеде өңір намысын Ислам Сағынәлиевтен тәлім алатын бөрлілік биатлоншылар қорғады.
Бірнеше күнге созылған жарыста 2010- 2014 жылдар аралығында туған жас биатлоншылар өзара сынға түсті. Қорытындысында жекелей жарыста 2012-2013 жылғы мерген шаңғышылар сайысында Андрей Пирог үшінші орын иеленсе, Әлішер Мәліков ел чемпионы атанды.
Спринт және жекелей сындарда жарыс жолына шыққан облыс биатлоншыларының біразы үздік он бестіктен түскен жоқ. 2010-2011 жылғы ұлдар арасында Арын Тажибаев спринтте 6, жекелей сында 9-шы болды. Осы жастағы Анастасия Соколова спринтте жетінші, жекелей жарыста сегізінші орынға түұрақтаса, Лейла Мұқатова спринтте 10-шы жекелей сында 12-ші орынды қанағат тұтты. Ал 2012-2013 жылғы ұлдар арасындағы спринтте Андрей Пирог 7 орын, Әлішер Мәліков 9 орын иеленді.
Шынын айту керек облыста кенже қалған биатлон Ақсайда жанданып жатқаны қуантады.
- Биатлон өте қиын спорт түрі. Оны қолға алғанымызға көп бола қоймады. Десе де шәкірттерім жақсы нәтиже көрсетті. Ұл-қыздардың болашағы бар. Тек тынымсыз еңбектенуіміз керек. Сонда ғана нәтижеміз жақсара түседі, – дейді бапкер Ислам Сағынәлиев.
Түгелбай Бисен
