Жақында педагогтерге арналған жыл сайын өтетін «Жаңашыл мұғалім – 2023» республикалық байқауы қорытындыланды.
Мұғалімдердің білім беру саласындағы ақпараттық-коммуникациялық технологияларды дамытуға қосқан үлесін сараптау, педагогикалық инновацияларды қолдау және көтермелеу мақсатында ұйымдастырылған байқауда еліміздің әр өңірінен педагогтер бақ сынады.
Байқау қорытындысында тәуелсіз комиссия 4 аталым бойынша 5 жеңімпазды анықтады. Солардың бірі – Бәйтерек ауданына қарасты Новенький орта мектебінің
бастауыш сынып мұғалімі Ляйла Төлепқалиева «Тәрбие жұмысын ұйымдастырудағы цифрлық технологиялар» аталымы бойынша бас жүлдеге ие болып, 500 000 теңге ақшалай сыйлықпен марапатталды.
Ляйла Шапбазкерейқызы – оқытудың жаңа технологиясын терең меңгерген, өзіне де, оқушыларға да жоғары талап қоя білетін ұстаз. Оның ұйымдастыру қабілетін әріптестері жоғары бағалайды. Новенький орта мектебінде 2009 жылдан бері еңбек етеді. Ол өзінің негізгі мамандығымен қатар, 2011 жылдан бастап директордың тәрбие ісі жөніндегі орынбасары қызметін қоса атқарып келеді. Үнемі ізденісте жүретін ұстаз үздіксіз еңбектенуінің нәтижесінде 2021 жылы педагог-зерттеуші санатын қорғап, 2022 жылы Бәйтерек ауданының «Үздік педагог» атағын иеленген.
Гүлжамал Жолдығали,
«Орал өңірі»
